Սահմանադրական փոփոխությունների անհրաժեշտության մասին նախկինում ասում էին բոլոր քաղաքական ուժերը։ Այս մասին Երեւանի «Անի» հյուրանոցում ընթացող սահմանադրական փոփոխությունների քննարկման ժամանակ ասաց ԱԺ ՀՅԴ խմբակցության անդամ Արծվիկ Մինասյանը։
«Այլ հարց է կառավարման համակարգի փոփոխությունը։ Երկրորդ հարցով քիչ բան է ասվել»,- համաձայնեց Արծվիկ Մինասյանը։
Ինչ վերաբերում է իշխանության վերարտադրման նպատակով Սահմանադրությունը փոփոխելու վերաբերյալ նախագահի հասցեին հնչող մեղադրանքներին, Մինասյանն առաջարկեց կարդալ գործող Սահմանադրությունը եւ համոզվել, որ նախաձեռնությամբ կարող էր հանդես գալ կամ նախագահը կամ խորհրդարանը։
Անդրադառնալով սահմանադրական փոփոխությունների դրական կողմերին՝ Արծվիկ Մինասյանը նշեց, որ առաջին անգամ կարեւոր նշանակություն է տրվում ընտանիքին, պետական մակարդակով ապահովվում է հայրենադարձության քաղաքականությունը, բազմակուսակցական համակարգը ներկայացվում է որպես ժողովրդավարական արժեք։
Ընդհանուր առմամբ ի մի բերելով «կողմ» եւ «դեմ» ձայները՝ ՀՅԴ ներկայացուցիչը եկավ այն եզրակացության, որ նրանք, ովքեր առանց հասկանալու ուղղակի ընդդիմանում են ցանկացած նորամուծության, նրանք փորձում են պահպանել ներկայիս կառուցվածքը, այսինքն՝ վերարտադրել ներկայիս իշխանությունը։