Ռուսաստանի վարչապետ Վլադիմիր Պուտինն անձամբ է ստուգել Չիտա-Խաբարովսկ դաշնային նշանակության մայրուղու նոր ծածկի որակը։
Վարչապետը երկար ճանապարհ է ընկել «Լադա-Կալինա» վառ դեղին ավտոմեքենայով։
Ստարտից առաջ Պուտինը լրագրողներին ասել է. «Ես չեմ պատրաստվում ողջ ճանապարհը ղեկին անցկացնել։ Պետք է նայեմ, թե ինչ է արվել։ Ընդ որում, սա հերթական դեպքը չէ, հենց այդ պատճառով ես ուզում եմ ամեն ինչ տեսնել անձամբ` իմ աչքերով։ Իրադարձությունը, որի ականատեսն ենք լինելու ես եւ դուք, ընդհանուր առմամբ հերթական իրադարձությունը չէ երկրի համար։ Ես չեմ ուզում ավելորդ անգամ օգտագործել պաթետիկ բառեր, սակայն սա Ռուսաստանի համար կարեւոր իրադարձությունն է, նույնիսկ պատմական, քանի որ մեր պետությունը պատմության մեջ եւ ոչ մի անգամ ամբողջությամբ կապված չի եղել մայրուղիներով»։
Պուտինը նաեւ պատմել է, թե ինչու՞ է ճանապարհվել հենց դեղին «Լադա-Կալինայով»։
«Լադա» ընկերությունը մեր խոշորագույն արտադրողներից է, նրանք ինձ խնդրել են մեքենան ավտոշարասյան մեջ մտցնել, որպեսզի տեսնեն, թե ինչպես կդիմանա նման հեռավորության դեպքում։ Նրանք խնդրել են հենց այս մեքենայով, ես էլ հենց սրանով կգնամ»։
