Ադրբեջանի իշխանությունները նորից փորձում են քողարկել իրենց անհաջողությունները։ Փաստացիորեն հարկադրելով ԵԱՀԿ-ին հրաժարվել առաջիկա ընտրություններում դիտորդություն իրականացնելուց՝ Ադրբեջանի իշխանությունները միաժամանակ փորձում են ստեղծված իրավիճակի պատասխանատվությունը բարդել ԵԱՀԿ-ի վրա։
Ավելի վաղ ԵԱՀԿ գլխավոր քարտուղար Լամբերտո Զանիերն ափսոսանք էր հայտնել, որ Ադրբեջան դիտորդական առաքելություն ուղարկելու հարցում համաձայնություն ձեռք չի բերվել։
Այս կապակցությամբ Ադրբեջանի ԱԳՆ մամուլի ծառայության ղեկավար Հիքմեթ Հաջիեւը հայտնել էր, որ ԵԱՀԿ/ԺՀՄԻԳ-ի կողմից 9.5 մլն բնակիչ ունեցող Ադրբեջան 400 դիտորդ ուղարկելն անտրամաբանական է։ «ԺՀՄԻԳ-ը Ադրբեջանում բնակչության, ընտրողների եւ դիտորդների քանակի նման անհամապատասխանությունը բացատրող տրամաբանական պատասխան դեռ չի տվել։ Դրա փոխարեն ԵԱՀԿ/ԺՀՄԻԳ ղեկավարությունը միակողմանի կարգով, առանց խորհրդակցությունների եւ կոպտորեն խախտելով մանդատը, որոշել է դիտորդական առաքելություն չուղարկել Ադրբեջան»,- ասել է Ադրբեջանի ԱԳՆ ներկայացուցիչը։
«Եթե ԵԱՀԿ/ԺՀՄԻԳ-ը դիտորդություն չի իրականացնելու, ապա նա զրկում է իրեն արդյունքները գնահատելու հիմքից»,- սպառնացել է Հաջիեւը։
Ադրբեջանն այսպիսով փորձում է ձեւական առումով ապահովել դիտորդների բացակայությունը, սակայն դրա հետ մեկտեղ սահմանափակել ընտրություններին հետեւելու նրանց ֆիզիկական հնարավորությունները։