Ժամանակակից բուհը չի կարող սահմանափակվել Հայաստանի աշխարհագրական տարածքում: Այս մասին, այսօր՝ հոկտեմբերի 13-ին, Երեւանի Մխիթար Հերացու անվան պետական բժշկական համալսարանի 95-ամյակին նվիրված միջոցառումների բացման հանդիսավոր արարողության ժամանակ նշել է ՀՀ կրթության եւ գիտության նախարար Արմեն Աշոտյանը:
Հոբելյանի առիթով ողջունելով ներկաներին՝ նախարարն ընդգծել է, որ ԵՊԲՀ-ն Հայաստանի բուհական համակարգի առաջատարներից է եւ այդ տեսանկյունից խորհրդանշական է, որ հոբելյանական միջոցառումների մեջ առանձնահատուկ տեղ է տրվել գիտական համաժողովներին:
«Բժշկական համալսարանում ինձ համար թանկ է ամեն մի լսարանն ու սենյակը, սա իմ մայր բուհն է ու այստեղ ամեն մի պատն ու անկյունը իր ուրույն պատմությունն ունի: Բժշկական համալսարանի անցյալը, ներկան ու ապագան շաղկապված է սերունդների հերթափոխով: Սա միջավայր է, որտեղ կրթությունը, գիտությունն ու առողջապահությունը շաղկապված են անբաժանելի կապով: Այս բուհի բոլոր շրջանավարտները, վստահ եմ, հրաշալի գիտեն բուհի պատմությունը եւ երախտապարտ են՝ ստացած գիտելիքների, դեպի կյանք տրված ուղեգրի ու այս պատերի ներքո ձեւավորված աշխարհայացքի համար:
Բժշկականում կրթություն ստացող երիտասարդը ձեռք է բերում ոչ միայն մասնագիտական գիտելիքներ, այլեւ աշխարհայացք ու արժեհամակարգ»,- շնորհավորական իր խոսքում նշել է Ա. Աշոտյանը:
Կարեւորելով բուհի հետագա զարգացումը՝ նախարարն ընդգծել է, որ ժամանակակից բուհական կրթության մարտահրավերներն այլեւս չեն կարող սահմանափակվել միայն Հայաստանի աշխարհագրական տարածքում. «Իմ ցանկությունն է տեսնել ԵՊԲՀ-ն Հայաստանի սահմաններից դուրս միջազգային չափանիշներով ճանաչված վարկանիշային սանդղակների ցանկում: Սա առողջ ձգտում է, որը բուհը պետք է անպայման դնի իր առջեւ: Պետք է նկատել, որ ԵՊԲՀ-ի շնորհիվ այսօր մեր բուհական համակարգը կարողանում է ապահովել եվրոպական չափանիշներով օտարերկրյա ուսանողների ներգրավվածության բարձր ցուցանիշ: Ժամանակակից բուհը չի կարող հաջողություն ունենալ, եթե միջազգայնացման աստիճանը, շրջանավարտների ու դասախոսների շարժունությունը, արտասահմանցի ուսանողների տեսակարար կշիռը մեծ չէ: Համալսարանի համար շատ կարեւոր բաղադրիչ է նաեւ հետազոտությունների ծավալը եւ այս առումով եւս բժշկականը ունի հստակ արդյունքներ: Գիտական եւ հետազոտական բաղադրիչի կարեւորությամբ է նաեւ պայմանավորված, որ բուհի հոբելյանական միջոցառումների մեկնարկային այցեքարտը դարձել են ուսանողական եւ դասախոսական գիտաժողովները»,- իր խոսքը եզրափակել է ՀՀ ԿԳ նախարարը՝ շնորհակալություն հայտնելով բուհի դասախոսներին արդյունավետ եւ մրցունակ աշխատանքի համար: