Ադրբեջանում խորհրդարանական ընտրությունների հետ կապված նախընտրական քարոզչությունը կսկսվի հոկտեմբերի 9-ին եւ կավարտվի հոկտեմբերի 31-ին։
Ինչպես տեղեկացնում է contact.az-ը, պատգամավորության թեկնածուները զրկված են լրատվամիջոցներում նախընտրական անվճար քարոզչության հնարավորությունից: Ընտրական օրենսգրքի համաձայն, հանրային հեռուստատեսությունում եւ ռադիոյում անվճար քարոզչության իրավունք ունեն միայն այն քաղաքական կուսակցությունները, որոնք իրենց թեկնածուներին գրանցել են ավելի քան 60 ընտրատեղամասում։ Նման իրավունք է ստացել միայն իշխող «Ենի Ազերբայջան» կուսակցությունը, որը սակայն հրաժարվել է օգտվել դրանից։
Նախորդ խորհրդարանական ընտրություններին Հանրային հեռուստաընկերությունը պատգամավորության թեկնածուներին անվճար եթերային ժամանակ էր տրամադրում։ Հոկտեմբերի 8-ին տեղի ունեցած ԿԸՀ-ի նիստին դրա նախագահ Մազահիր Փանահովը ենթադրել է, որ Հանրային հեռուստաընկերությունը հրաժարվել է եթերաժամ տրամադրել «տնտեսական դժվարությունների պատճառով»։ Բայց ԿԸՀ-ի անդամ Ալիֆ Ղուրբանովը տրամաբանորեն հակադարձել է դրան՝ ասելով, թե ինչ ֆինանսական խնդիրներ կարող է ունենալ այն հեռուստաալիքը, որն ամբողջությամբ ֆինանսավորվում է պետության կողմից։ «Եթե ընկնում են նավթի գները, ուրեմն պիտի թեկնածուների եթերն արգելե՞ն։ Այդ պատճառով ընտրողնրը պիտի զրկվե՞ն բանավեճերից», - ասել է Ղուրբանովը, եւ նրա հարցերն անպատասխան են մնացել։
Միաժամանակ, Հանրային հեռուստաընկերությունը քարոզչության համար վճարովի եթերը տրամադրում է աստղաբաշխական գումարների դիմաց։ Այսպիսիով՝ քարոզչության համար թեկնածուներին մնում են միայն փողոցների ստենդները։
