Գերմանիայի կառավարությունը, չնայած Թուրքիայում տիրող իրավիճակի շուրջ կոշտ բանավեճերին, հակված է բանակցել նախագահ Էրդողանի հետ Եվրոպայում փախստականների ճգնաժամը կարգավորելու նպատակով։ Եկող կիրակի կանցլեր Անգելա Մերկելը, որն իր կառավարման 10 տարիների ընթացքում բախվել է ամենալուրջ քաղաքական ճգնաժամին, կմեկնի Թուրքիա՝ խորհրդարանական ընտրություններից առաջ նախագահ Ռեջեփ Թայիփ Էրդողանի եւ վարչապետ Ահմեդ Դավութօղլուի հետ բանակցելու։ Այս մասին ասված է Der Spiegel գերմանական պարբերականում «Մերկելը մեկնում է Էրդողանի մոտ. անխուսափելի չարիքը» վերտառությամբ լույս տեսած հոդվածում։
Բունդեսթագի մամուլի խոսնակ Շտեֆեն Զայբերթը, տեղեկացնելով Մերկելի այցելության մասին, նշել էր, որ քննարկվելիք թեմաներն են լինելու ահաբեկչության դեմ պայքարը, փախստականների խնդիրը եւ Սիրիայի հակամարտությունը։
«Մերկելն հույս ունի, որ թուրքական բանակը Միջերկրական ծովում՝ Հունաստանի հետ սահմանին, ավելի խիստ հսկողություն կսահմանի։ Էրդողանը դրա փոխարեն պահանջում է Թուրքիայի համար Եվրամիությունում անվիզա ռեժիմ սահմանել եւ Սիրիայի հյուսիսում բուֆերային գոտի ստեղծել՝ քրդական պետության ձեւավորումը կանխելու նպատակով»,- ասված է հոդվածում։
Պարբերականը նշում է, որ Բունդեսթագում իշխող մեծ կոալիցիան վստահ է, որ իրենք չեն կարող առանց Թուրքիայի լուծել փախստականների խնդիրը։ Ընդդիմությունն իր հերթին զգուշացնում է նախքան նոյեմբերի 1-ի խորհրդարանական ընտրությունները Էրդողանին լրացուցիչ քաղաքական բեմ չտրամադրել։ Բունդեսթագի Կանաչների միության նախագահ Ջեմ Օզդեմիրը Անկարայի ահաբեկչությունից հետո Էրդողանին մեղադրել էր իրավիճակը լարելու եւ ընտրությունների շեմին այդ ողբերգական դեպքերից իր օգուտը քաղելու մեջ։
«Անգելա Մերկելը որոշել է չլսել Ջեմ Օզդեմիրին։ Մինչ Կանաչների առաջնորդը ԵՄ-ին զգուշացնում է մինչեւ նոյեմբերի 1-ին կայանալիք խորհրդարանական ընտրությունները սառեցնել Թուրքիայի հետ բանակցությունները, Բունդեսկանցլերը որոշել է կիրակի այցելել այդ երկիր, որը հոկտեմբերի 10-ի ողբերգական ահաբեկչությունից հետո ներքաղաքական առումով ավելի է մասնատվել։
Մերկելն ուզում է խոսել թուրք քաղաքական գործիչների հետ, քանի որ միայնակ միգրացիոն ճգնաժամը կարգավորելու հեռանկարներ նա չի տեսնում»,- շարունակում է Der Spiegel-ը։
Պարբերականը հիշեցնում է, որ Երամիությունը կարող է ապահով պահել իր արտաքին սահմանները, եթե միայն նույնն անեն ԵՄ հարեւան բոլոր պետությունները։ «Թուրքիային սա վերաբերում է առավել քան որեւէ մի այլ երկրի։ Եթե ԵՄ-ն Թուրքիան ճանաչի որպես անվտանգ երկիր, կարող է մերժել այնտեղից ժամանող ներգաղթյալներին փախստականի կարգավիճակ շնորհելու դիմումները։ Այդ պատճառով Եվրոպային անհրաժեշտ է համաձայնագիր կնքել Թուրքիայի հետ, որը կկարգավորի փախստականների խնդիրը։ Դրա դիմաց ԵՄ-ն Թուրքիային պետք է բավականին շոշափելի միջոցներ հատկացնի, որպեսզի Գերմանիայից մերժում ստացած եւ հետ ուղարկված փախստականներին թուրքական ճամբարներում համաֆինանսավորում ապահովի։
