«Բարգավաճ Հայաստան» կուսակցությունը այսօրվանից՝ հոկտեմբերի 13-ից, սկսել է Սահմանադրական փոփոխությունների քարոզարշավը:

ԲՀԿ մամուլի բաժնից NEWS.am-ին հայտնել են, որ ԲՀԿ ղեկավար կազմի ներկայացուցիչները՝ Նաիրա Զոհրաբյանը, Աբրահամ Մանուկյանը, Միքայել Մելքումյանը, Թամար Պողոսյանը եւ Վահան Բաբայանը այսօր այցելել են Վայոց ձոր: Եղեգնաձորում տեղի ունեցած հանդիպման հարցերի շրջանակը լայն է եղել. երկրում ստեղծված ներքաղաքական իրավիճակը, տնտեսական խնդիրները, Սահմանադրական փոփոխությունների հարցը, ինչպես նաեւ՝ կուսակցության առաջիկա անելիքները:

Սահմանամերձ Խաչիկ գյուղի բնակիչները ԲՀԿ ներկայացուցիչներին խնդրել են գյուղնախարարությանը փոխանցել, որ սահմանը պահող սահմանամերձ գյուղերը այսօր չեն կարողանում իրացնել ոչ միայն խաղողի եւ խնձորի առատ բերքը, այլեւ մսամթերքը, ինչը գյուղացիներին լրջագույն վարկային պարտավորությունների տակ է դրել: ԲՀԿ ներկայացուցիչները խոստացել են այս եւ կուսակցության ակտիվի եւ համայնքների բնակիչների ներկայացրած մտահոգությունները բարձրացնել պատկան մարմինների առաջ:

ԲՀԿ-ի հաջորդ հանդիպումը կլինի Սիսիանում:

Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին: Քարոզարշավը սկսվել է հոկտեմբերի 10-ից;