Աբովյան քաղաքի «Նարեկ» ռեստորանային համալիրի հետնամասում հոկտեմբերի 12–ին ծառից կախված հայտնաբերված 33-ամյա երիտասարդի դեպքով նյութեր են նախապատրաստվում: Այս մասին NEWS.am-ին հայտնեցին Քննչական կոմիտեի մամուլի ծառայությունից:
«Նարեկ» ռեստորանային համալիրից էլ մեզ հայտնեցին, որ մահացած երիտասարդը՝ Հարություն Անախասյանը, իրենց աշխատակիցը չի եղել, դեպքը ռեստորանից բավականին հեռու է եղել:
«Նախկին գործարանի տարածք է, մենք մի ծայրում ենք, դեպքը մյուս ծայրում է եղել, այնտեղ տարբեր օբյեկտներ կան, սակայն գիտենք, որ ինքը մեր տարածքի աշխատակից չի եղել: Միայն գիտենք, որ աբովյանցի է»,- ասացին ռեստորանից:
Նշենք, որ Հարություն Անախասյանն Աբովյանի 2-րդ միկրոշրջանի բնակիչ էր, նա երկվորյակ եղբայր ունի, իսկ քույրը 2 տարով մեծ է նրանցից:
Ավելի վաղ հայտնել էինք, որ Աբովյան քաղաքի «Նարեկ» ռեստորանային համալիրի հետնամասում հոկտեմբերի 12–ին երիտասարդ տղամարդու դի է հայտնաբերվել: NEWS.am-ի տեղեկություններով՝ մահացածը Աբովյանի բնակիչ է, 33 տարեկան, նա ռեստորանի աշխատակից չէ։
Ոստիկանությունից NEWS.am-ի հետ զրույցում հայտնել են, որ դիակի վրա բռնության հետքեր չեն եղել: