2015թ. ոստիկանությունը փակելու է պատշաճ վիճակով: Այսօր՝ հոկտեմբերի 13-ին, ոստիկանության Երևան քաղաքի վարչությունում տեղի ունեցած աշխատանքային խորհրդակցության ժամանակ այս մասին հայտարարել է ոստիկանության պետ Վլադիմիր Գասպարյանը:
Ոստիկանության լրատվական ծառայությունից NEWS.am-ին հայտնել են, որ Գասպարյանը դրական է գնահատել ոստիկանների աշխատանքը՝ միաժամանակ ուշադրություն հրավիրելով ծառայության մեթոդաբանությունը մշտապես կատարելագործելու և արդիականացնելու անհրաժեշտությունը:
«Տարին պետք է փակենք պատշաճ վիճակով, սա նշանակում է՝ բարոյահոգեբանական մթնոլորտ, աշխատանքային կարգապահություն, բացահայտման ուղղությամբ տարվող բոլոր օպերատիվ, քննչական, բացատրական եւ այլն աշխատանքները»:
Ոստիկանության պետի խոսքով՝ պետք է ուշադրություն դարձնել գործնական պարապմունքների վրա, հատկապես երիտասարդ կադրերի պատրաստության, նրանց նախորդ սերնդի փորձը հաղորդելու վրա. «Երիտասարդ լինելը թերություն չէ, առավելություն է: Երիտասարդ կադրին չսովորեցնել, չօգնել, մեր ծերուկներին չբերել, որ մասնագիտական պարապմունքներ անցկացնեն, աշխատանքային փորձը ցույց չտալը, մեղմ ասած, անգործունեություն է»:
Վլադիմիր Գասպարյանն ընդգծել է, որ ոստիկաններն աշխատում են ոչ ստանդարտ վիճակներում, եւ ոստիկանը պետք է պատրաստ լինի ցանկացած իրավիճակի, առավել եւս «եթե մեկը մի թերություն է թույլ տալիս, քարկոծվում է ամբողջ համակարգը»:
Ամփոփելով խորհրդակցությունը՝ Վլադիմիր Գասպարյանը կոնկրետ ցուցումներ ու հանձնարարականներ է տվել ստորաբաժանումների ղեկավարներին:
«Մեր նշած թերություններով հանդերձ առանջընթաց կա, ամենակարեւորը՝ ոստիկանության բաժինները տեսնում են իրենց սխալները: Համոզված եմ՝ տարին պատշաճ կփակենք»,- ասել է նա:
Մանրամասները՝ ոստիկանության պատրաստած տեսանյութերով:
