«Իսլամական պետություն» (ԻՊ) խմբավորումը հաստատել է իր առաջնորդներից մեկի՝ հիերարխիայում երկրորդ ղեկավարի զոհվելու փաստը: Այս մասին հաղորդում է France Presse գործակալությունը:
Օգոստոսին ԱՄՆ-ն հայտարարել էր Իրաքի Մոսուլ քաղաքում ամերիկյան ռազմաօդային ուժերի ավիահարվածների ընթացքում ԻՊ-ի առաջնորդներից մեկի ոչնչացման մասին:
«Ամերիկան ցնծում է Աբու Մութազ ալ-Քուրաշիի մահվան առիթով եւ դա ներկայացնում է որպես իր մեծագույն հաղթանակ»,- ծայրահեղականների կայքերից մեկում հրապարակված ԻՊ-ի հայտարարությունն է մեջբերում գործակալությունը:
ՌԻԱ Նովոստիի փոխանցմամբ, այն ժամանակ Սպիտակ տան հայտարարությունում զինյալը ներկայացվում էր որպես «Ֆադել Ահմադ ալ-Հայալի, որը հայտնի է նաեւ որպես Հաջի Մոութազ»: Արեւմտյան լրատվամիջոցները նշում են, որ ալ-Հայալին հայտնի էր բազմաթիվ անուններով եւ մականուններով: