Սյունիքի մարզի Կապան քաղաքի կենտրոնական հրապարակում «երգող», լուսային էֆեկտներով շատրվաններ են կառուցվել: Շատրվանների կառուցումը, որոնց բացումը նախագահ Սերժ Սարգսյանի մասնակցությամբ կայացավ հոկտեմբերի 13-ին, նախաձեռնել է Զանգեզուրի պղձամոլիբդենային կոմբինատը:
«Քաղաքապետարանի եւ գործարանի միջեւ կնքված պայմանագրի համաձայն, հրապարակը 25 տարով հանձնվել է կոմբինատին՝ բարեկարգման համար: Մենք էլ ցանկացանք քաղաքացիներին նվեր մատուցել կոմբինատի կողմից: Շատրվանը երկրորդն է հանրապետությունում լուսային համակարգով, սարքավորումներն ավելի ժամանակակից են, քան Երեւանինը»,- լրագրողներին ասաց կոմբինատի վարչական տնօրեն Վահե Հակոբյանը:
Շատրվանների կառուցման համար 540 միլիոն դրամ է ծախսվել: Հրապարակում կառուցվում է նաեւ բիզնես կենտրոն, մշակույթի պալատ, որոնցից առաջինը պատրաստ կլինի հաջորդ տարի, մյուսը՝ ավելի ուշ:
Հավելենք, որ նախագահ Սերժ Սարգսյանը Կապանում մասնակցել է նաեւ քաղաքի օրվան ընդառաջ կազմակերպված տոնակատարություններին: