ՀՀ Տարածքային կառավարման ու արտակարգ իրավիճակների նախարարությունը աշխատում է սովորական ռեժիմով: Այս մասին հայտնել է նախարարության տեղեկատվության ու հասարակայնության հետ կապերի վարչության պետի տեղակալ Նանա Գնդոյանը ՝ NEWS.am –ի թղթակցի խնդրանքով մեկնաբանելով լրատվամիջոցներում տարածված տեղեկությունը, թե 911 ծառայությունը սահմանամերձ գյուղերում աշխատանքի ուժեղացված ռեժիմի է անցնում:
«Նախարարության բոլոր ստորաբաժանումներն աշխատում են սովորական ռեժիմով: Ոչ մի արտառոց բան գերատեսչության աշխատանքում չկա, իսկ եթե աշխատանքային ռիթմի որեւէ փոփոխություն լինի, այդ մասին կհայտնենք պատշաճ կարգով»,- նշել է Նանա Գնդոյանը:
Տարածքային կառավարման ու արտակարգ իրավիճակների նախարարության ներկայացուցիչը նաեւ շեշտել է, որ 911 ծառայությունը սահմանամերձ գյուղերում միշտ էլ ակտիվ է աշխատում, եւ այս տեսակետից որեւէ փոփոխություն չկա:
Ավելի վաղ «ժողովուրդ» թերթը գրել էր, որ հայ-ադրբեջանական սահմանին լարվածության կապակցությամբ ՏԿ եւ ԱԻ նախարարության 911 ծառայությանը հանձնարարվել է հերթապահություն սահմանել սահմանամերձ գյուղերում: «Հերթապահություն իրականացնող աշխատակիցներին զենք են բաժանել, քանի որ բացառված չէ, որ գնդակոծությունների հետ մեկտեղ ադրբեջանցի դիվերսանտները կարող են նաեւ թիկունքից գրոհել»,- հավաստիացնում է թերթը: Տվյալ հրապարակումն առաջացրել է ադրբեջանական կողմի անհեթեթ մեկնաբանությունները:
