Որդու ընկերոջը` 12-ամյա Մարտին Բալյանին, ծեծի ենթարկած 36-ամյա Մխիթար Սարգսյանը կալանավորվել է: Այս մասին NEWS.am-ին հայտնեց Սարգսյանի կինը՝ Սաթենիկ Հովսեփյանը:
Սաթենիկ Հովսեփյանի խոսքով, հոկտեմբերի 19-ին, Երեւանի Շենգավիթ վարչական շրջանի ընդհանուր իրավասության դատարանում դռնփակ նիստում որոշվել է երկամսյա ժամկետով կալանավորել Մխիթար Սարգսյանին: Մեղադրյալն այժմ «Նուբարաշեն» քրեակատարողական հիմնարկում է:
«Փակ դատ էր, մեզ ոչ մի բան չասացին, հիմա ինքը կալանավայրում է»,-ասաց Մխիթար Սարգսյանի կինը:
Նշենք, որ Մխիթար Սարգսյանի դեմ բողոքը հետ էր վերցվել, սակայն նրան նոր մեղադրանք է առաջադրվել ՀՀ Քրեական օրենսգրքի 113 հոդվածի 2-րդ մասի 5-րդ կետի հատկանիշներով, այն է՝ դիտավորությամբ եւ առանձին դաժանությամբ մեկ ուրիշին մարմնական վնասվածք կամ առողջությանը որեւէ այլ վնաս պատճառելը, որն առաջացրել է առողջության տեւական քայքայում կամ ընդհանուր աշխատունակության մեկ երրորդից պակաս զգալի կայուն կորուստ:
Մեզ հետ զրույցում 12-ամյա Մարտինի մայրը՝ Լալա Բալյանը հայտնել էր, որ ներել է Մխիթար Սարգսյանին եւ հետ է վերցրել բողոքը:
Հիշեցնենք, որ Քննչական կոմիտեի Երեւան քաղաքի վարչության Շենգավիթ վարչական շրջանի քննչական բաժնում Մխիթար Սարգսյանի նկատմամբ հարուցվել էր քրեական գործ՝ ՀՀ քրեական օրենսգրքի 118-րդ հոդվածով, այն է՝ ծեծելը կամ այլ բռնի գործողություններ կատարելը, որը չի առաջացրել առողջության կարճատեւ քայքայում կամ ընդհանուր աշխատունակության աննշան կայուն կորուստ:
12-ամյա երեխայի նկատմամբ նշանակվել է դատաբժշկական փորձաքննություն: Մարտինը ստացել էր քթի կոտրվածք, գանգուղեղի ցնցում:
Ինչպես ավելի վաղ հայտնել էր NEWS.am-ը, 12-ամյա Մարտին Բալյանին բակում ծեծի էր ենթարկել ընկերոջ հայրը՝ 36-ամյա Մխիթար Սարգսյանը, որին երեք տարվա ազատազրկում է սպառնում: