Ձմռան նախաշեմին «Էյ-Ի-Ջի Սերվիս» ընկերությունում ստեղծվել է աշխատանքային խումբ՝ ՀՀ գազասպառման համակարգերի տեխնիկական սպասարկման բոլոր տարածքային ծառայություններում գազասպառման համակարգերի օգտագործման անվտանգության մակարդակի բարձրացումն ապահովելու նպատակով:
Այս առնչությամբ, «Էյ-Ի-Ջի Սերվիս» ընկերության մամուլի ծառայության տարածած հաղորդագրությունում, մասնավորապես, նշվում է.
«Ձմռան նախաշեմին Հայաստանի Հանրապետության բնակչության մեծ մասը իրենց բնակարանների ջեռուցումն ապահովում է երկնագույն վառելիքի միջոցով: 2015 թ. նոյեմբերի 1-ի դրությամբ ՀՀ-ում բնական գազ է օգտագործում 664723 գազասպառող բաժանորդ:
Օդի ջերմաստիճանի նվազման պատճառով զգալիորեն բարձրանում է կենցաղային գազի սարքավորումների ծանրաբեռնվածությունը, եւ բաժանորդները պետք է առավել զգոնություն ցուցաբերեն ու պահպանեն գազի օգտագործման անվտանգության կանոնները:
2015-2016թթ. ջեռուցման սեզոնի հետ կապված «Էյ-Ի-Ջի Սերվիս» ընկերության գլխավոր տնօրեն Արսեն Հարությունյանի հանձնարարականի համաձայն ստեղծվել է աշխատանքային խումբ՝ ՀՀ Գազասպառման համակարգերի տեխնիկական սպասարկման բոլոր տարածքային ծառայություններում գազասպառման համակարգերի օգտագործման անվտանգության մակարդակի բարձրացումն ապահովելու, ինչպես նաեւ կենցաղում հնարավոր պատահարների կանխարգելման նպատակով: Մասնավորապես, անհրաժեշտ է, խիստ հետեւողական լինել ռիսկային խմբեր հանդիսացող բաժանորդների նկատմամբ, արգելել ապօրինի տեղադրված ինքնաշեն եւ շահագործման համար ոչ պիտանի եւ պահանջվող նորմերի խախտումներով տեղադրված գազասարքերի շահագործումը: Միաժամանակ շարունակել հրահանգավորել բաժանորդներին գազային տնտեսությունում անվտանգության կանոնների պահպանման եւ գազի արտահոսքի հայտնաբերման ձայնազդանշանային սարքերի կարեւորության մասին:
Գլխավոր տնօրենի հանձնարարականի համաձայն` տարածքային սպասարկման կենտրոններում պետք է խիստ հսկողության տակ պահել բաժանորդների կողմից ստացված հեռախոսազանգերը եւ համապատասխանաբար ապահովել արագ արձագանքում:
