Նոյեմբերի 15-ին «Արեւորդի» միջազգային բնապահպանական փառատոնի շրջանակում անցկացվել է «Փողկապ եւ քամի» հեծանվաերթը: Միջոցառումը կազմակերպվել է Վայրի բնության եւ մշակութային արժեքների պահպանման հիմնադրամի եւ Սիրողական հեծանվային սպորտի եւ հեծանվային զբոսաշրջության ֆեդերացիայի համատեղ նախաձեռնությամբ։ Ինչպես փառատոնի ծրագրում ներառված մյուս միջոցառումները, «Փողկապ եւ քամին» նույնպես իրականացվել է հիմնադրամի գլխավոր գործընկեր ՎիվաՍել-ՄՏՍ-ի աջակցությամբ։
Ազատության հրապարակից պաշտոնական հագուստով ավելի քան 60 հեծանվորդներ հեծանվաերթով անցել են Երեւան քաղաքի կենտրոնական փողոցներով։ Արշավը նպատակ է ունեցել հանրային ուշադրությունը հրավիրել օդի աղտոտվածության, խոշոր համայնքները մեքենաներով ծանրաբեռնելու աճող միտման խնդրին, եւ այդ համատեքստում ընդգծել քաղաքներում հեծանվային մշակույթի ներդման կարեւորությունը:
Հեծանվարշավին մասնակցել են պետական, հասարակական, ուսումնական հաստատությունների ներկայացուցիչներ եւ պարզապես գաղափարը սատարող քաղաքացիներ:
Վայրի բնության եւ մշակութային արժեքների պահպանման հիմնադրամի, «Արեւորդի» բնապահպանական փառատոնի հիմնադիր Ռուբեն Խաչատրյանը երթին մասնակցել է էլեկտրական շարժիչ ունեցող հեծանվով, որը փորձարկում է արդեն մեկ տարի: «Վայրի բնության եւ մշակութային արժեքների պահպանման հիմնադրամն արդեն իսկ ՄԱԿ-ի զարգացման հիմնադրամի Գլոբալ էկոլոգիական հիմնադրամի Փոքր դրամաշնորհների ծրագրի շրջանակում սկսել է քաղաքային երթեւեկությունում էլեկտրական հեծանիվների ներդրմանն ուղղված «Կանաչ շարժունակություն» նախագծի իրականացումը», - ասել է Ռուբեն Խաչատրյանը։
Միջոցառման լրատվական լուսաբանումը կարող եք դիտել այսօր` հեռուստաընկերությունների երեկոյան լուրերի թողարկումներում:
ՎիվաՍել-ՄՏՍ... Դու կապ ունես: