Ամերիկյան Smart Ltd ընկերությունը հայելի է ստեղծել, որն ի վիճակի է առանց բջջային հեռախոսի կամ ֆոտոխցիկի սելֆի անել, տեղեկացնում է Lenta-ն` վկայակոչելով The Mirror-ին:
Նոր ապրանքը ցուցադրող տեսանյութում ասվում է, որ հայելին կարող է պրոֆեսիոնալ լուսանկարներ կամ տեսնյութեր նկարել, որոնք հետո կարելի է տեղադրել Instagram-ում կամ YouTube-ում: Սարքի կառավարումն իրականացվում է սենսորային հարթակի միջոցով:
Լուսանկարներն անում է գաղտնի տեսախցիկը, որը գտնվում է հայելու մակերեւույթին: Սարքը զինված է շարժման տվիչներով եւ կարող է հետեւել տանը տեղի ունեցող դեպքերին` անթել կապով լուսանկարներն ուղարկելով սմարթֆոնի տիրոջը: Բացի այդ, ներկառուցված բարձրախոսների միջոցով կարող է երաժշտություն վերարտադրել:
Ինչպես նշում է The Mirror-ը, նոր գյուտը կարող է սելֆի-ձողի մրցակիցը դառնալ:
Ենթադրվում է, որ սթարտապը կֆինանսավորվի քրաուդֆանդինգային Indiegogo հարթակի միջոցով, սակայն այժմ արդեն հնարավոր է արտադրողի կայքում նախնական պատվեր ձեւակերպել: 68,5 սանտիմետրը 119,3-ի վրա չափեր ունեցող սարքի արժեքը կկազմի 250 դոլար, իսկ ավելի փոքր` 68,5-ը 80-ի վրա նմուշը կարժենա 200 դոլար: