Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր՝ նոյեմբերի 19-ին, «Բանդայի գործով» ամբաստանյալ Քյարամ Ամոյանին մեղավոր ճանաչեց՝ դատապարտելով 7 տարվա ազատազրկման:
Դատարանի որոշմամբ՝ Քյարամ Ամոյանի գույքը չի բռնագրավվի, նա դատաբժշկի հսկողությամբ բուժում կանցնի դատապարտյալների հիվանդանոցում:
Ավելի վաղ հայտնել էինք, որ մեղադրողը Քյարամ Ամոյանի համար դատախազը 8 տարվա ազատազրկում էր պահանջել:
Նշենք, որ 2014թ.-ի մայիսի 7-ին հաշվի առնելով դատաբժշկական փորձաքննության արդյունքները՝ Կենտրոն եւ Նորք Մարաշ ընդհանուր իրավասության դատարանը որոշել էր Քյարամ Ամոյանի մասն առանձնացնել եւ 6 ամսով հետաձգել քննությունը: Նույն թվականի նոյեմբերի 10-ին քննությունը վերսկսվել էր: 2015թ. փետրվարին կրկնակի դատահոգեբուժական փորձաքննություն էր նշանակվել, որից հետո դատավարությունը նորից հետաձգվել էր:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցավորության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Դավիթ Գալստյանը, Արթուր Մանուկյանը եւ Սամվել Դավթյանը դատապարտվել են 11-15 տարվա ազատազրկման: