Հայաստանի ազգային հավաքականը վերջին շրջանում ունի կադրային խնդիրներ. այդուհանդերձ, հավաքական չեն հրավիրվում մի քանի կարեւոր ֆուտբոլիստներ: Մասնավորապես, խոսքը Դոնեցկի «Օլիմպիկի» հարձակվող Գեղամ Կադիմյանի մասին է, որը լավ մրցաշրջան է անցկացնում իր թիմում: 

NEWS.am-ի թղթակից Վերա Մարտիրոսյանի հետ զրույցում ֆուտբոլիստը պատմեց, թե արդյոք առաջխաղացում կա իր՝ Հայաստանի հավաքական հրավիրվելու հարցում:
Գեղամ, Հայաստանի ազգային հավաքականի գլխավոր մարզիչ Սարգիս Հովսեփյանն ասաց, որ քո խաղին հետեւում են, սակայն դեռ ժամանակ չի եղել քեզ հրավիրելու: Մեկ ու կես ամիս անցավ, ինչ-որ բան փոխվե՞լ է:
Ես կարդացել եմ այդ հարցազրույցը: Ինձ շատ հաճելի էր, որ ինձնով հետաքրքրվում է  հավաքականի մարզիչը: Բայց ոչ ֆեդերացիայի, ոչ հավաքականի ներկայացուցիչներից որեւէ մեկն ինձ հետ կոնտակտի դուրս չի եկել: Եթե հանկարծ լինի հրավեր, ես մեծ սիրով կմիանամ Հայաստանի հավաքականին:
Հավաքականից ինչ-որ մեկի հետ շփվո՞ւմ ես:
Երբ «Փյունիկում» էի խաղում, այնտեղ տղաներ կային որոնք այժմ հավաքականում են, բայց շփում չկա հիմա:
Եթե հենց վաղը հրավեր լինի, քեզ մոտ ամեն ինչ պատրաստ կլինի՞՝ թղթաբանություն, ակումբի հետ հարցեր եւ այլն:
Ես պատրաստ եմ: Ինչ վերաբերում է թղթաբանությանը, կարծում եմ՝ այդ բոլոր հարցերով պետք է զբաղվի ֆեդերացիան:
Հայաստանի ազգային հավաքականում ո՞ր դիրքում ես քեզ տեսնում:
Դոնեցկի «Օլիմպիկի» գխավոր մարզիչը ինձ խաղացնում է երեք գոտիներում՝ աջ եւ ձախ առաջ քաշված կիսապաշտպան, ինչպես նաեւ կենտրոնական հարձակվող: Այդ երեք դիրքերում էլ կարող եմ հանդես գալ նաեւ հավաքականում, բայց դա մարզչի որոշելիքն է:
Ի՞նչ կասես հայկական ֆուտբոլի ներկա վիճակի մասին:
Հայկական ֆուտբոլը լավ մակարդակի վրա է, ֆուտբոլիստները տեխնիկապես զարգացած են: Հավաքականում խաղում են բարձրակարգ ֆուտբոլիստներ: Պարզապես վերջին ժամանակները բախտն այդքան էլ չի բերում:

Վերա Մարտիրոսյան/ Vera&Football