Հայաստանում անչափահասների նկատմամբ ֆիզիկական եւ սեռական բռնություններից բացի մեծ տարածում ունի հոգեբանական բռնությունը: Այս մասին այսօր՝ նոյեմբերի 19-ին, լրագրողների հետ հանդիպմանը նշել է «ՍՕՍ մանկական գյուղեր» բարեգործական հիմնադրամի Ընտանիքների ամրապնդման ծրագրի ղեկավար Սյուզան Բադեյանը:
«Երեխաների նկատմամբ բռնության ձեւերը համակցված են: Եթե կա ֆիզիկական եւ սեռական բռնություն, դա բերում է հուզական բռնության: Այս տեսակը շատ անտեսված է, բայց ծանր հետքեր է թողնում երեխաների վրա: Շարունակական վիրավորանքները, սպառնալիքները, մեկուսացումը, երեխային ծաղրելը, քննադատելը բերում են նրան, որ երեխան մեծանում է շատ անվստահ իր ուժերի հանդեպ, էմոցիոնալ թերի զարգացած, ագրեսիվ, կամ ամաչկոտ: Մայրերը հաճախ ցույց են տալիս, որ իր երեխան անցանկալի է իր համար, հետո բողոքում, թե երեխան անկառավարելի է դարձել: Իսկ դա հոգեբանական մեծ հարված է երեխայի համար»,-նշել է նա:
Սյուզան Բադեյանի խոսքով՝ հոգեբանական բռնության ենթարկված երեխաներին հեշտությամբ կարելի է տարբերել խնդիրներ չունեցող հասակակիցներից:
«Նրանք բարդույթավորված են, կարող են եղեունգները կրծել, մատը ծծել, մազերի հետ խաղալ: Իսկ դա չի ուղղվում, երեխաները շատ հաճախ: Այդ բարդույթները, որոնք ձեւավորվել են տարիների ընթացքում, չեն հաղթահարում, քանի որ ծնողի սերը այլ միջամտություններով չի կարելի փոխարինել»,-ասել է նա:
«ՍՕՍ մանկական գյուղեր» բարեգործական հիմնադրամի Ընտանիքների ամրապնդման ծրագրի ղեկավարը ընդգծել է, որ իրենք փորձում են նախ վերականգնողական աշխատանքներ տանել խնդրահարույց ծնողների եւ նրանց երեխաների հետ, եւ դրական արդյունքի չհասնելու դեպքում նոր միայն դիմել արդարադատությանը՝ ծնողներին խնամակալությունից զրկելու պահանջով:
Նշենք, որ նոյեմբերի 19-ը Երեխաների հանդեպ բռնությունների կանխարգելման համաշխարհային օրն է:
