Ռուսաստանի տնտեսությունում անբարենպաստ իրավիճակը հանգեցրել է Հայաստանից խմիչքի արտահանման ծավալների կրճատմանը: Նշենք, որ այս խմբում, կոնյակից բացի, վիճակագրությունը ներառում է նաեւ ալկոհոլային այլ խմիչքներ, ինչպես նաեւ ալկոհոլային ըմպելիքներ: Սակայն կարելի է վստահաբար պնդել, որ այս ապրանքախմբում արտահանման զգալի ծավալը կազմում է կոնյակը:
Պաշտոնական տվյալներով, ԱՊՀ երկրներ խմիչքի արտահանումը հունվար-սեպտեմբերին կրճատվել է գրեթե 16.7 մլրդ դրամով (կամ 36.8%-ով): Այս անկումը մեկ տասներորդ մասով փոխհատուցվել է այլ երկրներ մատակարարումների աճով (1.6 մլրդ դրամով կամ 32.4%-ով):
Ձեռնարկությունների աշխատակիցների թվի առումով ԱՊՀ երկրներ արտահանման պատկերը հետեւյալն է. ամենամեծ անկումը՝ գրեթե 8.2 մլրդ դրամի չափով, գրանցվել է միջին ձեռնարկություններում (51-100 աշխատակից): Փոքր-ինչ լավ արդյունք է եղել խոշոր ձեռնարկություններում (101 եւ աշխատակից). կրճատումը՝ 7.5 մլրդ դրամից քիչ պակաս:
«Խոշորների» խմբում ներառված են մեր կոնյակի ոլորտի առաջատարները՝ «Երեւանի կոնյակի գործարանն» ու «Երեւանի կոնյակի-գինու-օղու Արարատ կոմբինատը»: Սակայն կոնկրետ ձեռնարկությունների մասով ցուցանիշները դիտարկելն անհնար է. կոմերցիոն գաղտնիքն արգելում է բացահայտել ընկերությունների տվյալները:
Արտադրանքի իրացման անկումը հանգեցրել է ոլորտի մի շարք ցուցանիշների վատթարացմանը: Միջին ձեռնարկությունների մասով աշխատանքի արտադրողականությունը հունվար-սեպտեմբերին կրճատվել է գրեթե 73%-ով (!), խոշոր ձեռնարկությունների մասով՝ շուրջ 16%-ով: Ներկայացնենք աշխատանքի արտադրողականության բացարձակ ցուցանիշները (առանց ԱԱՀ-ի եւ ակցիզահարկի)՝ ամսական 1 աշխատակցի հաշվարկով: Եվ այսպես, միջին ձեռնարկությունների մասով աշխատանքի արտադրողականությունը 3.8 մլն դրամից հասել է 1.0 մլն դրամի: Այսինքն՝ գրեթե 4 անգամ կրճատվել է: Խոշոր ձեռնարկությունների մասով անկումն ավելի պակաս է եղել՝ ավելի քան 1.6 մլն դրամից մինչեւ 1.4 մլն դրամից պակաս:
Հավելենք, որ ոլորտի միջին ձեռնարկությունների խմբում աշխատակիցների թիվը մեկ տարվա ընթացքում կրճատվել է «ընդամենը» 17 անձով, իսկ խոշորներում նույնիսկ ավելացել է 92-ով: Հաշվետու ժամանակահատվածում անձնակազմի ամենամեծ կրճատումը գրանցվել է փոքր ձեռնարկություններում. այս խմբում, ընդհանուր առմամբ, 73 անձով: