Ռուսաստանի ՆԳՆ-ն ֆրանսիական ոստիկանությանը գամփռի ձագ կնվիրի՝ ի նշան համերաշխության Փարիզի ահաբեկչություններից հետո: Այս մասին հաղորդում է գերատեսչության կայքը:
«Վլադիմիր Կոլոկոլցեւը, ի նշան համերաշխության, մտադիր է ռուսական կինոլոգների կողմից ֆրանսիացի գործընկերներին գամփռի ձագ նվիրել, որը կարող է ծառայության անցնել ահաբեկիչների չեզոքացման հատուկ գործողության ժամանակ զոհված Դիզել անունով ծառայողական շան փոխարեն»,- ասված է հաղորդագրությունում:
Ըստ Gazeta.ru-ի, ֆրանսիական ոստիկանության գործողության ընթացքում զոհվել է Դիզել անունով ոստիկանական շունը: Այդ գործողության արդյունքում ոչնչացվել է Փարիզի ահաբեկչությունների կազմակերպիչ Աբդելհամիդ Աբաուդը:
Հիշեցնենք, որ նոյեմբերի 13-ին Փարիզում տեղի ունեցած ահաբեկչությունների հետեւանքով 130 մարդ է զոհվել, ավելի քան 300 հոգի վիրավորվել է: