Ադրբեջանի ԱԱՆ ձերբակալված աշխատակիցները տեսակցությունների սենյակներում փաստաբանների հետ հանդիպումների ժամանակ շշուկով են խոսում, քանի որ վստահ են, որ դրանցում գաղտնալսող սարքեր կան: Հենց նրանք են ժամանակին այդ սենյակներում այդպիսի սարքեր տեղադրելու հրաման տվել: Այս մասին haqqin.az-ին հայտարարել է ԱԱՆ նախկին աշխատակիցներից մեկի փաստաբան Քյամանդար Նասիբովը:
Փաստաբանը, ինչպես եւ գեներալ Ա.Չովդարովի պաշտպան Ռասուլ Սադիգովը, վրդովված է մեկուսարանում պաշտպանական կողմի անձնական գրառումների անհիմն ստուգումների առիթով: «Դա դատաիրավական օրենսգրքի կոպիտ խախտում է, քանի որ մեզ զրկում են պաշտպանության իրավունքից: Շատերն են վրդովվում, թե ինչու ենք պաշտպանում սեփական ժողովրդի դեմ սարսափելի հանցագործություններ կատարած ԱԱՆ նախկին աշխատակիցներին: Նախ՝ այդ հանցագործությունները դեռեւս պետք է դատական կարգով ապացուցվեն, չէ՞ որ Ադրբեջանն իրավական պետություն է, այնպես չէ՞: Երկրորդ՝ բոլոր հանցագործները պաշտպանության իրավունք ունեն: Եվ մենք, որպես պրոֆեսիոնալ փաստաբաններ, պարտավոր ենք նրանց պաշտպանություն ապահովել: Բայց մեզ թույլ չեն տալիս աշխատել»,- ասել է Նասիբովը:
Փաստաբանը մտադիր է բողոք ներկայացնել դատարան եւ Ադրբեջանի նախագահին:
Հիշեցնենք, որ Ադրբեջանի ԱԱՆ-ի շուրջ սկանդալ է հասունացել: Նախարարին ազատել են պաշտոնից, միաժամանակ պարզվել է, որ գերատեսչությունը զբաղվել է դրամաշորթությամբ եւ մարդկանց առեւանգմամբ: