Նոր ծնված երեխայի կարգաթիվն այսուհետ կարող է որոշվել՝ հաշվի առնելով նոր ծնված երեխայի մորից սերված երեխաներին՝ անկախ համատեղ բնակվելու վայրից: Այս մասին, այսօր՝ նոյեմբերի 23-ին, Ազգային ժողովում «Պետական նպաստների մասին» ՀՀ օրենքում փոփոխություններ կատարելու մասին օրենքի նախագիծը երկրորդ ընթերցմամբ եւ ամբողջությամբ ընդունելու մասին հարցի քննարկման ժամանակ ասաց ՀՀ աշխատանքի եւ սոցիալական հարցերի նախարար Արտեմ Ասատրյանը:
«Առաջին ընթերցմամբ ընդունվելուց հետո մեզ տարբեր առաջարկություններ են արվել, որոնց շնորհիվ փոփոխություններ են մտցվել նախագծում: Այսպես, երկու հոդված փոփոխվել է. այսուհետ երեխան խնամքի նպաստ կստանա, եթե ծնողն ու երեխան հաշվառված են ՀՀ բնակության վայրի հասցեում, այսինքն հանվել է նույն վայրում հաշվառված լինելը: Բացի դրանից, նոր ծնված երեխայի կարգաթիվը որոշելու կարգն է փոփոխվել. այսուհետ հաշվի ենք առնելու նոր ծնված երեխայի մորից սերված երեխաներին՝ անկախ համատեղ բնակվելու վայրից»,- ասաց Արտեմ Ասատրյանը:
Հիշեցնենք, որ նպաստի համար ծնողի ու երեխայի՝ հաշվառված լինելը միեւնույն հասցեում լինելու պահանջի վերաբերյալ փոփոխության առաջարկ էր ներկայացրել «Օրինաց երկիր» խմբակցությունը՝ նշելով, որ Հայաստանի իրականության մեջ մայրն ու երեխան երբեմն նույն հասցեով գրանցված չեն լինում (մորը գրանցում են ամուսնու տանը որոշ ժամանակ հետո):
Նշենք, որ փոփոխություները կարգավորում են մինչեւ երկու տարեկան երեխային խնամքի նպաստի վճարման կարգն ու պայմանները (նախատեսվում է նաեւ անկանխիկ եղանակով, ինչպես նաեւ լիազորագրով, այլ անձի փոխարեն նպաստի ստացումը):