Սահմանադրական փոփոխությունների նախագիծը ռիսկային է, սակայն դրական առաջընթացի ակնկալիքները շատ են։ Այս մասին այսօր՝ նոյեմբերի 23-ին, Լոռու մարզի Օձուն գյուղում՝ սահմանադրական փոփոխությունների շուրջ «Իրապատում» հաղորդման շրջանակում նշել է ԱԺ ԲՀԿ պատգամավոր Միքայել Մելքումյանը։
«Պետք է ասեմ, որ ռիսկեր կան, բայց ակնկալիքները շատ են, որոհետեւ Սահմանադրության փոփոխությունը միանգամից չի ծնվել։ Մեր պետության 25 տարվա պատմությունը ցույց տվեց, որ մենք սոցիալ-տնտեսական, դատաիրավական, արդարադատության վերջնական կայացման հետ պրոբլեմ ունենք։ Աշխատանքի, նպաստի, թոշակների հետ կապված խնդիրներ կան, որոնք պետք է վերջնականապես լուծել իրավական դաշտում կարգուկանոն մտցնելով»,-ասել է պատգամավորը։
Ըստ Միքայել Մելքումյանի՝ Սահմանադրության նոր մոդելով փորձ է արվում ստեղծել կառավարման այնպիսի կառուցվածք եւ բովանդակություն, որտեղ Կառավարությունը հաշվի կնստի հասարակության հետ իր չարածների համար։
«Այսօր թոշակը, նպաստը առայժմ անբավարար են ոչ միայն արտաքին պատճառներով, այլեւ ներքին կառավարման արդյունավետության հետ կապված։ Ներկայիս Սահմանադրությամբ օրենք չկա, թե ինչու պետք է կառավարությունը հրաժարական տա իր չարածի համար։ Հիմա այս նոր մոդելը փորձ է անում ստեղծել այնպիսի մի կառավարման կառուցվածք եւ բովանդակություն, որտեղ պետության ղեկավարը փաստացիորեն վարչապետն է լինելու, գերկենտրոնացված լիազորություններ այլեւս չեն լինելու։ Այնպիսի մեխանիզմ է ստեղծվելու, որ Ազգային ժողովը, Կառավարությունը՝ ի դեմս վարչապետի, եւ նախագահը իրար հակակշռելու են, մեկը մյուսին վերահսկեն»,-նշել է նա։
Միքայել Մելքումյանն ընդգծել է նաեւ նոր Սահմանադրությամբ նախատեսվող ընդդիմության լիազորությունների ընդլայնումը։
«Ընդդիմությունը ոչ թե կօտարվի, այլ ընդդիմությանը պետության կառուցման գործերին մասնակցություն կտրվի։ Ազգային ժողովում լինելու են քննիչ հանձնաժողովներ, որտեղ ղեկավարությունը լինելու է ընդդիմությունից»,-ասել է նա։
Անդրադառնալով Օձունի ներքին խնդիրներին՝ ԲՀԿ պատգամավորը նշել, որ անհրաժեշտ է համայնքում փոքր արտադրություններ ստեղծել։
Նշենք, որ Սահմանադրական փոփոխությունների հարաքվեն տեղի կունենա դեկտեմբերի 6-ին։ Նախագծով նախատեսվում է անցում կառավարման խորհրդարանական համակարգի։