Ռուսական «Ուֆա» ֆուտբոլային ակումբի դարպասապահ Դավիդ Յուչենկոն ցանկանում էր խաղալ Հայաստանի հավաքականում, սակայն Հայաստանի ֆուտբոլի ֆեդերացիայի կողմից քայլեր չարվեցին: Այս մասին Յուրչենկոն նշել է NEWS.am-ի թղթակցի հետ զրույցում:
Նշենք, որ 2015-ի սկզբից ՀՖՖ նախագահ Ռուբեն Հայրապետյանը հեռուստաեթերում հայտնել էր, որ բանակցություններ են ընթանում «Ուֆայի» դարպասապահ Դավիդ Յուչենկոյի հետ (ով ունի հայկական ծագում մայրական կողմից): Նախնական ասվել էր, որ մայիսին ֆուտբոլիստը կմիանա Հայաստանի հավաքականին: Իր հերթին Յուրչենկոն հայտարարել էր, որ նույնպես ցանկանում է խաղալ Հայաստանի հավաքականում: Հուլիսին ազգային հավաքականի գլխավոր մարզչի ժամանակավոր պաշտոնակատար Սարգիս Հովսեփյանն ասել էր, որ բանակցությունները շուտով կավարտվեն: Իսկ արդեն նոյեմբերին Յուրչենկոն հայտնել էր, որ չի միանա Հայաստանի հավաքականին եւ նախընտրում է հանդես գալ Ռուսաստանի ազգային հավաքականում: NEWS.am-ի թղթակից Վերա Մարտիրոսյանը զրուցեց ֆուտբոլիստի հետ՝ իմանալու իրական պատճառը:
Դավիթ, մեկ տարի է լսում էինք, որ Դուք գալու եք Հայաստանի հավաքական, սակայն վերջերս հարցազրույց տվեցիք, եւ ասացիք, որ ուզում եք Ձեր ուժերը փորձել Ռուսաստանի հավաքականում՝ առանց բացատրելու, թե ինչու:
Ես իսկապես ասել էի, որ գալու էի Հայաստան, ուզում էի գալ, բայց այս ողջ ընթացքում ես չտեսա Հայաստանի Ֆուտբոլի Ֆեդերացիայի կողմից համապատասխան ջանքեր եւ աշխատանք՝ իմ գալու հարցում: Նրանք ավելի շատ խոսում էին, քան գործում:
Հիմնական խնդիրը Ռուսաստանում լեգիոներների թվի սահմանափակման օրե՞նքն էր:
Ոչ, ես իմ ցանկությունը հայտնել էի: Ուղղակի վերջում ծանր ու թեթեւ անելով բոլոր «այո»-ներն ու «ոչ»-երը, որոշեցի մնալ այստեղ: Ես մաքսիմալիստ եմ ու կփորձեմ ապացուցել, որ այստեղ նույնպես կարող եմ հասնել հաջողության: Ես միշտ զգում էի ու գնահատում երկրպագուների հետաքրքրությունն ու վերաբերմունքն իմ հանդեպ: Նույն վերաբերմունքը չկար ՀՖՖ-ի կողմից: Ինձ թվում է՝ բոլորն էլ հասկանում են, թե իրականում ինչ է կատարվում, պարզապես աշխատում են աչքերը փակել:
Վերա Մարտիրոսյան/ Vera&Football