Սահմանադրական փոփոխություններին «այո» ասողները գրեթե մեկ ու կես անգամ գերազանցում են «ոչ» ասողներին: Այս մասին այսօր` նոյեմբերի 23-ին, լրագրողների հետ զրույցում ասաց ՀՀԿ խմբակցության պատգամավոր Տաճատ Վարդապետյանը` նշելով, որ սահմանադրական փոփոխությունները ընդդիմության կողմից չեն ընդունվում, քանի որ դրանք իշխանության առաջադրած փոփոխություններն են:
«Մենք քաղաքացիների հետ հանդիպել, շփվել ենք եւ հասկացել ենք, որ «այո» -ի կողմնակիցները գրեթե մեկ ու կես անգամ գերազանցում են «ոչ» ասողներին: Կարծում եմ, որ ողջախոհություն է պետք եւ հուսով եմ, որ քաղաքացիական բարձր գիտակցությամբ կմասնակցեն քաղաքացիները հանրաքվեին եւ կանեն իրենց ընտրությունը»,-ասաց նա:
«Ժառանգություն» կուսակցության փոխնախագահ Արմեն Մարտիորսյանն էլ նշեց, ոչ դեկտեմբերի 6-ին հասարակությունը ոչ միայն կարող է գնալ եւ «այո» կամ «ոչ» ասել սահմանադրական փոփոխությունների նախագծին, այլեւ կարող է ընդհանրապես չգնալ քվեարկելու:
«Հասարակությունն այլընտրանք ունի եւ եթե ինքներդ չեք ցանակնում գնալ տեղամաս, սխալ է, որ գանք ձեռքերդ բռնենք ու ասենք գնացեք «ոչ» ասեք, դա ձեր ընտրության հարցն է: մենք ցանկանում ենք մինչեւ հանրաքվեի օրը հավաքվել ու լուրջ գործընթացներ իրականացնել, եթե հնարավոր է իշխանափոխություն իրականացնենք, եթե չէ, վերահսկողություն սահմանենք տեղամասերում»,-ասաց Արմեն Մարտիրոսյանը:
Նա նշեց, որ սահմանադրական փոփոխություններով Հայաստանում միակուսակցականություն կհաստատվի, որը չի կարելի թույլ տալ:
«Անտվանգության հետ կապված շատ խնդիրներ ունենք, հեղհեղուկ տարածաշրջանում ենք ապրում, ունենք թշնամի հարեւաններ եւ պետք է վստահության վրա ստեղծված իշխանություն ձեւավորենք երկրում: Ակնհայտ է, որ նոր սահմանադրությամբ երկրում տեղի են ունենալու քաղաքական համակարգի խորը հետաճ: Նոր սահմանադրությունն ամրապնդելու է երկրում առկա կառավարման համակարգը, որը գնում է դեպի միակուսակցականություն: Պատահական չէ, որ բոլոր որոշումներն ընդունվում են Մելիք Ադամյան փողոցում»,-ասաց Արմեն Մարտիրոսյանը:
Նշենք, որ Սահմանադրական փոփոխությունների հարաքվեն տեղի կունենա դեկտեմբերի 6-ին։ Նախագծով նախատեսվում է անցում կառավարման խորհրդարանական համակարգի։
