Երեւանի «Շենգավիթ» բժշկական կենտրոնում նոյեմբերի 19-ին երեկոյան 25-ամյա ծննդկանի արգանդում մահացած 36 շաբաթական պտուղի պորտալարը փաթաթված է եղել: Այս մասին NEWS.am-ի թղթակցին ասաց բժշկական կենտրոնի բուժգծով տեղակալ Դավիթ Մխիթարյանը:
«Հղին մեզ դիմել է միջադեպից 12 օր առաջ, գանգատներ է ունեցել, ախտորոշվել է խնդիր եւ որոշում է կայացվել նրան հոսպիտալացնել: Այս 12 օրերի ընթացքում նա պատրաստվել է վաղաժամ ծնունդի, այս ընթացքում նա եղել է պաթոլոգիայի բաժանմունքում»,- ասաց նա:
Դավիթ Մխիթարյանի խոսքով՝ նոյեմբերի 19-ին բժշկուհի Անի Սիրունյանի հերթապահության ժամանակ որոշվել է կատարել խթանում եւ ծննդալուծում:
«Այս ընթացքում նա երկու անգամ հետազոտվել է: Ապա բժիշկները կեսարյան են արել մեկ այլ հիվանդի: Երբ դուրս են եկել վիրահատարանից, հետազոտել են, պարզվել է, որ սրտի բաբախ չկա: Այնուհետեւ արդեն տեսել ենք, որ պորտալարը փաթաթված է եղել»,- ասաց բուժգծով տեղակալը՝ նշելով, որ կնոջ տագրը նույնպես ներկա է եղել ծննդալուծմանը:
Թե ինչն է եղել պտղի մահվան պատճառը, կպարզվի դիահերձումից հետո:
Նշենք, որ հարազատները պտղի մահվան մեջ մեղադրում են բժիշկներին:
NEWS.am-ի թղթակցի հետ զրույցում ծննդկան Լարիսա Շահբազյանը տագրը՝ Արթուր Քոչարյանը, պատմել էր, որ եթե Լարիսային հետազոտեին, պետք է անմիջապես կեսարյան հատում կատարեին, բայց հերթապահ բժիշկը միայն արհեստական ցավեր է տվել
«Սա հիվանդանոց չէ, չգիտեմ էլ՝ ինչի է... հարսիս գոնե ծնարան տանեին, իմանային՝ ինչ է կատարվում: Միայն ցավեր են տվել, հետո էլ հարսս զգացել է, որ երեխան այլեւս չի շարժվում: Երբ բժիշկները տարել են հետազոտման, հայտարարել են, թե սրտի կանգ է գրանցվել, իսկ Անի Սեյրանովնան չգիտենք ինչով էր զբաղված այդ պահին»,- ասել էր ծննդկանի տագրը:
