Քննչական կոմիտեն նոր մանրամասներ է հայտնել զինծառայող Ա.Հակոբյանի նկատմամբ բռնություն գործադրելու դեպքի մասին:
NEWS.am-ին Կոմիտեի մամուլի ծառայությունից հայտնեցին, որ որպես վկա հարցաքննվել են համածառայակիցները, նշանակվել է դատաբժշկական փորձաքննություն, առգրավվել են անհրաժեշտ փաստաթղթեր:
Օպերատիվ-հետախուզական միջոցառումներ ձեռնարկելու ուղղությամբ հանձնարարություն է տրվել համապատասխան ծառայությանը:
Ա.Հակոբյանի մոտ զորամասից հոսպիտալացվելիս և ՀՀ ՊՆ Երևանի կայազորային հոսպիտալ ընդունվելիս մարմնական վնասվածքներ չեն հայտնաբերվել:
Ա.Հակոբյանը հարցաքննվել է որպես տուժող: Վերջինս հայերեն գրավոր խոսքին չտիրապետելու պատճառով ցուցմունք է տվել թարգմանչի, ինչպես նաև` քրեական գործով տուժողի ներկայացուցիչ «Քաղաքացիական հասարակության ինստիտուտ» հասարակական կազմակերպության իրավաբան Ա.Մելիքյանի ներկայությամբ: