Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի դաժան սպանության մեջ մեղադրվող կուրսանտներից Վաչե Սահակյանի մեղավորությունը նախաքննական մարմինը ապացուցված է համարել միայն ցուցմունքների վրա հիմնվելով: Այս մասին NEWS.am-ի հետ զրույցում ասաց Վաչե Սահակյանի մայրը՝ Կարինե Քալանթարյանը:
«Համապատասխան փորձաքննություններ են արվել մազից, եղունգից, արյան, բոլորը մաքուր են եղել: Եթե պետք է չհավատան, էլ ո՞ւմ է պետք, որ էդքան գումար են ծախսում: Վաչեն ուզում ա դետեկտոր, ասում ա՝ իմ անմեղությունը ապացուցելու միակ ձեւն էդ ա, չեն անում»,- ասաց նա:
Վաչեի մոր խոսքով՝ գործով վկաների ցուցմունքները հակասում են իրար, նրանցից ոմանք մի անգամ ասել են, թե տեսել են Վաչե Սահակյանին, մեկ ուրիշ ասել են, թե չեն տեսել, նրանք կատարվածը տարբեր կերպ են ներկայացրել:
Նշենք, որ գործը դատարանում է: Ըստ մեղադրական եզրակացության՝ ռազմական ինստիտուտի կուրսանտներ Գնել Թևոսյանը, Նորիկ Սահակյանը,Վաչե Սահակյանը և Մովսես Ազարյանը հունվարի 29-ին ժամը 02:00-ից 03:00-ի սահմանում զորամասի առաջին գումարտակի առաջին մարտկոցի թիվ 408 ննջարանում առանձին դաժանությամբ, խուլիգանական դրդումներով սպանել են կուրսանտ Հայկազ Բարսեղյանին:
Հիշեցնենք, որ 2015թ. հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:
Տուժող կողմը գոհ է նախաքննությունից, մեղադրվող կողմը` դժգոհ: Ըստ կուրսանտների փաստաբանների՝ նախաքննությանը բավարար ապացույցներ չեն հավաքվել, որոնք ապացուցում են մեղադրյալների մեղավորությունը: