Այսօր Հարավային Կովկասի կայունությանն ու անվտանգությանը սպառնացող ամենալուրջ վտանգը Բաքու – Մոսկվա հարաբերությունների մեջ է քողարկված: Այս մասին «Ղարաբաղյան հարց. հայկական դիվանագիտության խնդիրներն ու հեռանկարները» թեմայով Ադրբեջանական ԽՍՀ-ից փախստականների համագումարի նախագահության կազմակերպած քննարկման ժամանակ հայտնել է Տարածաշրջանային հետազոտությունների կենտրոնի վերլուծաբան, Լեւոն Տեր -Պետրոսյանի կառավարման տարիներին հատուկ ծառայությունների նախկին ղեկավար Դավիդ Շահնազարյանը:
Պատասխանելով ԼՂ-ի հարակից տարածքների վերադարձման ու ԵՏՄ-ին Ադրբեջանի անդամակցելու վերաբերյալ ռուսական «Կոմերսանտ» թերթի հոդվածում նկարագրված սցենարի հավանականության մասին հարցին՝ Շահնազարյանը նկատեց.«Կոմերսանտում» հոդվածները հենց այնպես չեն հայտնվում: Ռուսաստանի ու Ադրբեջանի մերձեցման գործընթացը բավականին արագ տեմպերով է ընթանում: Ոչ մեկի համար գաղտնիք չէ, որ Մոսկվայի ու Բաքվի միջեւ բանակցություններում քննարկվում է Եվրասիական տնտեսական միությանը Ադրբեջանի միանալու հարցը »:
Հիշեցնենք, որ ի պատասխան NEWS.am-ի հարցին՝ արդյոք ՌԴ ԱԳՆ ղեկավար Սերգեյ Լավրովի Երեւան կատարած վերջին այցի ժամանակ Հայաստանի իշխանությունների հետ քննարկվել է ադրբեջանական կողմին տարածքային զիջումների հարցը կամ էլ ղարաբաղյան կարգավորման մյուս ցավագին մանրամասները ՝ ՀՀ-ում ՌԴ դեսպանատնից հայտնել են, որ ՌԴ ԱԳՆ ղեկավար Սերգեյ Լավրովի Երեւան կատարած այցի շրջանակում Հայաստանի ղեկավարության հետ բանակցությունների ընթացքում ղարաբաղյան կարգավորման համատեքստում տարածքային զիջումների հարցը չի քննակվել:
