Ռուսաստանի նախագահ Վլադիմիր Պուտինը Սիրիայի տարածքում Սու-24-ի կործանումն անվանել է ահաբեկիչների հանցակիցների կողմից Ռուսաստանին թիկունքից հասցված հարված:
«Այս դեպքը դուրս է գալիս ահաբեկչության դեմ սովորական պայքարի շրջանակից: Իհարկե, մեր զինվորականները հերոսական պայքար են մղում ահաբեկչության դեմ, չխնայելով իրենց եւ իրենց կյանքը: Բայց այսօրվա կորուստը հարված է, որը թիկունքից մեզ հասցրել են ահաբեկիչների հանցակիցները: Ես այլ կերպ չեմ կարող որակել այն, ինչ այսօր տեղի է ունեցել»,- ասել է Պուտինը` Հորդանանի թագավոր Աբդալլահ II-ի հետ հանդիպմանը, տեղեկացնում է «ՌԻԱ Նովոստին»:
Նրա խոսքով, Թուրքիան հարված է հասցրել Ռուսաստանի ինքնաթիռին, չնայած Ռուսաստանը ԱՄՆ-ի հետ համաձայնագիր է կնքել նման միջադեպերը կանխելու ուղղությամբ:
«Այսօրվա ողբերգական դեպքը լուրջ հետեւանքներ կունենա ռուս-թուրքական հարաբերությունների վրա», - ասել է Պուտինը, տեղեկացնում է RT-ն https://russian.rt.com:
Պուտինը պարզաբանել է, որ ռուսական Սու-24 ինքնաթիռը Սիրիայում խփվել է Թուրքիայի սահմանից 1 կմ հեռավորության վրա, իսկ ընկել է 4 կիլոմետր հեռու: Նա ընդգծել է, որ ինքնաթիռը ոչ մի կերպ չէր սպառնում Թուրքիային:
«Մեր ինքնաթիռին Սիրիայի տարածքում հարված են հասցրել թուրքական F-16 ինքնաթիռի «օդ- օդ» հրթիռով»,- ասել է ռուս առաջնորդը:
Ռուսական Սու-24 ինքնաթիռը կործանելուց անմիջապես հետո թուրքական կողմը դիմել է ոչ թե Ռուսաստանին, այլ ՆԱՏՕ-ի իր գործընկերներին: «Ասես` մենք ենք խփել թուրքական ինքնաթիռը, ոչ թե նրանք` մերը: Նրանք ինչ է, ուզում են, որ ՆԱՏՕ-ն ԻԳԻԼ-ի՞ն ծառայի» – ասել է Պուտինը:
