«Իսլամական պետության» ահաբեկիչների գրաված տարածքներից մեծ քանակությամբ նավթ է մատակարարվում Թուրքիա։ Այս մասին հայտնել է ՌԴ նախագահ Վլադիմիր Պուտինը Հորդանանի թագավոր Աբդալլահ 2-րդի հետ հանդիպման ժամանակ, փոխանցում է RT-ը։
«Մենք վաղուց արձանագրել էինք այն փաստը, որ գրավված տարածքներից մեծ քանակությամբ նավթ եւ նավթամթերք է մատակարարվում Թուրքիա։ Այստեղից էլ խմբավորումների ֆինանսական սնուցումը։ Իսկ հիմա նաեւ մեզ թիկունքից հասցված հարվածներ, հարվածներ մեր օդանավերին, որոնք պայքարում են ահաբեկիչների դեմ»,- նշել է Պուտինը։
«Եթե ԻՊ-ն այդքան գումարներ ունի, իսկ խոսքը միլիոնավոր դոլարների մասին է, եթե ոչ միլիարդավոր դոլարների, ապա դա նավթից ստացվող եկամուտների եւ դրան գումարած՝ մի ողջ պետության Զինված ուժերի կողմից ստացվող աջակցության հաշվին է։ Այդ դեպքում հասկանալի է, թե ինչու են նրանք իրենց այդպես հանդուգն պահում»,- ասել է Պուտինը, փոխանցում է LifeNews-ը։
Ավելի վաղ ՌԴ ՊՆ-ն հաստատել էր, որ Սիրիայի եւ Թուրքիայի սահմանին այսօր խոցվել է ռուսական ՍՈւ-24 ռմբակոծիչը։ Նախնական տեղեկություններով՝ 2 օդաչուներից մեկը զոհվել է։