Պռոշյան գյուղում մարտի 3-ին հնչած կրակոցների գործով 2-րդ կասկածյալը հայտնաբերվեց նոյեմբերի 17-ին: Այս մասին NEWS.am-ին հայտնեցին ոստիկանության լրատվական ծառայությունից:
Ըստ ոստիկանության՝ մարտի 3-ին Պռոշյան գյուղում հնչած կրակոցների գործով կասկածյալ, Պռոշյանի բնակիչ Նշան Ավետիսյանն օգոստոսի 12-ին ինքնակամ ներկայացել էր ոստիկանության քրեական հետախուզության գլխավոր վարչություն: Մինչդեռ գործով մյուս կասկածյալին՝ Տրդատ Ասատրյանին, ոստիկանները հայտնաբերեցին նոյեմբերի 17-ին Ագարակ-Ոսկեվազ գյուղերի խաչմերուկում գտնվող ավտոտեխսպասարկման կետից:
Հիշեցնենք, որ դեպքը տեղի էր ունեցել Պռոշյան գյուղում՝ պուրակի եւ գյուղապետարանի դիմացի խաչմերուկում: Գյուղապետարանի պատին տեղադրված տեսախցիկները ֆիքսել էին կատարվածը:
Տեսանյութերի ուսումնասիրությամբ պարզվել էր, որ առաջին անգամ մեքենայից տուժողին ինչ որ բան են ասում, կամ գուցե սպառնում, այնուհետեւ նա վազում է մեքենայի հետեւից եւ ամենայն հավանականությամբ հայհոյում, ինչից հետո մեքենա հետ է վերադառնում եւ տեղի է ունենում հրաձգությունը:
Դեպքին ականատես վկան եւ մեքենայի համարանիշերն էր տեսել, եւ կրակողին էր ճանաչել: Նրա ցուցմունքի համաձայն կրակողը Պռոշյանի բնակիչ Նշան Ավետիսյանն է, իսկ մեքենայի ղեկին եղել է Տրդատ Ասատրյանը:
Մանրամասները՝ ոստիկանության պատրաստած տեսանյութում:
