Սահմանադրական փոփոխություններից հետո Սահմանադրությունը կդառնա ժողովրդակենտրոն, որի գլխավոր շահը ՀՀ քաղաքացու իրավունքի իրացման պատասխանատվությունը պետության կողմից կրելն է: Այս մասին այսօր՝ նոյեմբերի 24-ին, «Այո»-ի եւ «Ոչ»-ի ռեալիթի շոուի շրջանակում Լոռու մարզի Թեղուտ համայնքում հավաքվածների հետ հանդիպմանն ասել է ՀՅԴ-ական Արթուր Եղիազարյանը:
ՀՅԴ ներկայացուցչի խոսքով՝ Սահմանադրական փոփոխությունները պետք չէ դիտարկել՝ որպես իշխանություն-ընդդիմություն պայքար:
«Եթե բոլորս դեմ քվեարկենք դեկտեմբերի 6-ին, մյուս օրն իշխանություններն ավելի լա՞վը կլինեն, ինչո՞վ է տուժում գործող իշխանությունները, եթե մենք դեմ ենք քվեարկում: Պետք է գիտակցել այն համակարգային փոփոխությունները, որոնք մենք ենք առաջարկում այս նախագծով»,- ասել է նա:
Արթուր Եղիազարյանի կարծիքով՝ համակարգային ճգնաժամ է այսօր Հայաստանում, եւ Սահմանադրական փոփոխությունները հենց դրա հետ են կապված:
«Դրական արձագանքներ են լինելու փոփոխություններից հետո: Խնդրում եմ ընտրություն կատարել սառնասրտորեն»,- նշել է նա:
Հիշեցնենք, որ «Հյուսիս» ուղղության այո-ի մասնակիցներն են՝ ԱԺ «Հանրապետական» խմբակցության պատգամավորներ Մարգարիտ Եսայանը, Սամվել Ֆարմանյանը, ԱԺ ԲՀԿ խմբակցության պատգամավոր Միքայել Մելքումյանը, ՀՅԴ անդամ Արթուր Եղիազարյանը: Իսկ «Ոչ»-ի ճակատից են «Հայազն» կուսակցության ներկայացուցիչ Արմեն Մկրտչյանը, «Ազատ Դեմոկրատներ» կուսակցության ներկայացուցիչ Նարեկ Այվազյանը, Վարդան Խաչատրյանը: