ՀՀԿ խմբակցության ղեկավար Վահրամ Բաղդասարյանը կարծում է, որ  ԵԽԽՎ-ում ընդունած հերթական հակահայկական զեկույցի հարցում բոլորն են թերացել։ Այս մասին նա  հայտնել է NEWS.am-ի հետ զրույցում։

Նշենք, որ նախօրեին ԵԽԽՎ սոցիալական հանձնաժողովն ընդունեց Արցախում Սարսանգի ջրամբարի մասին հակահայկական զեկույցը, որը նախաձեռնել է  Բոսնիա եւ Հերցոգովինայից պատգամավոր Միլիցա Մարկովիչը։ Ի դեպ վերջինս այդ զեկույցը ներկայացրել է առանց ԼՂՀ այցելելու։

«Եթե մի հիմնական զեկուցող, որը որ  առանց տվյալ տարածքի ուսումնասիրության  զեկույցով հանդես է գալիս ու անտեղյակ է՝  ինչի մասին է խոսում, բնականաբար, դրա ճակատագիրն արդեն նախօրոք որոշված էր»,-ասել է Վահրամ Բաղդասարյանը։

Հարցին, թե  պատվիրակությունն արդյոք չի թերացել զեկույցների կանխելու գործում եւ չպե՞տք է վերանայի իր գործելաոճը, Բաղդասարյանը պատասխանել է․«Մենք վերանայել ենք մեր աշխատանքները, թերացումը պատվիրակությանը չէ, բոլորս ենք թերացել, եւ մենք պետք է մտածենք, որ  եւ արտաքին գործերի նախարարության, եւ պատգամավորների,  եւ պատվիրակության,  եւ այն բոլոր մնացած պատվիրակությունների, որոնք ներկայացված են  Եվրամիությոնում, գործողումների են գնու, բոլորի համընդհանուր աշխատանքն է»։

ՀՀԿ խմբակցության ղեկավարը կրկին հիշեցրել է, որ սա Ադրբեջանի խավիարային դիվանագիտության արդյունքն է։ Անդրադառնալով այս կապակցությամբ Նիկոլ Փաշինյանի այն մեկնաբանությանը, թե հայաստանյան պատվիրակության ծախսերի փոխարեն խավիար ուղարկեն ԵԽԽՎ, Բաղդասարյանն ասել է․«Երբ որ Նիկոլ Փաշինյանը խավիարի արտադրամաս դնի, դրա մասին կմտածենք»։