Ռուսաստանի ԱԳՆ-ի՝ Թուրքիա չայցելելու մասին քաղաքացիներին ուղղված կոչի ֆոնին Ռոստուրիզմն արդեն նոյեմբերի 24-ից տուրօպերատորներին խորհուրդ կտա դեպի այդ երկիր տուրփաթեթներ չվաճառել: Այս մասին ՌԻԱ Նովոստիին ասել է գերատեսչության ղեկավար Օլեգ Սաֆանովը:
«ՌԴ ԱԳՆ-ի հայտարարությանը Ռոստուրիզմը կարձագանք անհապաղ: Արդեն այսօր մենք համառորեն խորհուրդ կտանք դադարեցնել դեպի Թուրքիա տուրփաթեթների վաճառքը ինչպես ուղղակի, այնպես էլ երրորդ երկրի միջոցով»,- ասել է Սաֆոնովը:
Նա նաեւ հավելել է, որ ներկայում Ռոստուրիզմը տուրօպերատորների շրջանում հարցում է անցկացնում, թե այս պահին որքան զբոսաշրջիկ է հանգստանում Թուրքիայում:
Հիշեցնենք, որ նոյեմբերի 24-ին Սիրիայում կործանվել է ռուսական Սու-24 ինքնաթիռը: ՌԴ նախագահ Վլադիմիր Պուտինը հայտարարել է, որ այն խոցվել է թուրքական F-16 կործանիչի կողմից եւ ընկել Սիրիայի տարածքում, Թուրքիայի հետ սահմանից 4 կմ հեռավորությամբ: Իսկ ՌԴ ԱԳ նախարար Սերգեյ Լավրովը հայտարարել է, որ Թուրքիայի կողմից ահաբեկչության աճող սպառնալիքն ավելի պակաս չէ, քան Եգիպտոսից, այդ պատճառով ռուսաստանցիներին խորհուրդ չի տրվում առաջիկայում Թուրքիա այցելել:
