Վանաձոր համայնքի 2016թ.-ի բյուջեի հանրային քննարկմանը այսօր` նոյեմբերի 24–ին, ավագանու անդամ Վահագն Դավիթավյանն ու Գայանե Քալանթարյանը Վանաձորի քաղաքապետ Սամվել Դարբինյանին առաջարկեցին քաղաքի հասարակական կազմակերպություններին գումար հատկացնել հարցն ավագանու նիստին քննարկելուց ու որոշում կայացնելուց հետո միայն:
Գայանե Քալանթարյանը նշեց, որ նման առաջարկ արել է դեռ մեկ տարի առաջ՝ 2015թ. բյուջեի հանրային քննարկման ժամանակ և քանի որ ոչինչ չի փոխվել, ստիպված է առաջարկը կրկնել նաև այսօր:
«Մենք երբևիցե չենք իմանում, թե որ հկ-ին ինչքան է տրվում, միայն հաշվետվությունների ժամանակ ենք իմանում: Ընդհանրապես, կարելի է այդ տողը հանել, հկ-ն դիմի քաղաքապետարան կամ ավագանուն, ավագանու նիստի ժամանակ հատկացվի համապատասխան գումարը»,- նշեց Վահագն Դավիթավյանը:
«Եթե չեմ սխալվում, հկ-ներից մեկին հենց ավագանին գումար տվեց, իսկ ի՞նչ եղավ էդ գումարը… Մենք դրա հաշվետվությունն էլ չտեսանք»,- նկատեց քաղաքապետը, ինչին ի պատասխան Վահագն Դավիթավյանը հիշեցրեց, որ այդ հատկացումն արվել է ավագանու անդամի գործունեության հետ կապված ծախսեր կետով:
Քննարկմանը ներկա «Լոռեցիների միավորում» հասարակական կազմակերպության նախագահ Մենուա Բրուտյանը ևս կողմ էր այս առաջարկին. «Թող ծրագիրը հաստատի ավագանին, նոր հկ-ն աջակցություն ստանա»:
Այս անգամ հակադարձեց քաղաքապետարանի աշխատակազմի քարտուղար Գագիկ Սիմոնյանը.
«Տարիներ առաջ ձեր կազմակերպսւթյանն էլ բյուջով գումար հատկացվեց, ձեր հաշվետվությո՞ւնն ուր է»:
«Եթե պահանջեիք, կներկայացնեինք»,- արձագանքեց հկ նախագահը: