ԱՄՆ պաշտպանության նախարարությունը ռադիոտվյալների հիման վրա պնդել է, որ թուրքական ինքնաթիռների օդաչուները հարձակումից առաջ ռուսական Սու-24-ի անձնակազմին նախազգուշացրել են Թուրքիայի օդային տարածք ներխուժելու մասին:
«Այո՛, ես կարող եմ դա հաստատել»,- ճեպազրույցի ժամանակ հայտարարել է Մերձավոր Արեւելքում եւ Հյուսիսային Աֆրիկայում ԱՄՆ կենտրոնական հրամանատարության ներկայացուցիչ Սթիվեն Ուորենը՝ պատասխանելով հարցին, արդյո՞ք ԱՄՆ-ի տվյալները հաստատում են Թուրքիայի հայտարարությունները:
«Միջադեպը տեղի է ունեցել սահմանին, միայն սա կարող եմ ասել: Մենք առայժմ փորձում ենք հավաքել եւ վերլուծել բոլոր տվյալները»,- ասել է Ուորենը:
Ըստ ՌԻԱ Նովոստիի, նա նաեւ հայտարարել է, որ ռուսական Սու-24 օդանավի խոցման միջադեպին մասնակցել է Ռուսաստանի եւ Թուրքիայի 2-ական ռազմական ինքնաթիռ: «Թուրքական կառավարությունը հաղորդեց, որ երկու F-16 կործանիչներ սահմանային թռիչք են իրականացրել եւ հանդիպել ռուսական երկու Սու-24-երի, եւ ռուսական ինքնաթիռներից մեկը խոցվել է»,- հայտարարել է Պենտագոնի ներկայացուցիչը:
Հիշեցնենք, որ նոյեմբերի 24-ին Սիրիայում կործանվել է ռուսական Սու-24 ինքնաթիռը: ՌԴ նախագահ Վլադիմիր Պուտինը հայտարարել է, որ այն խոցվել է թուրքական F-16 կործանիչի կողմից եւ ընկել Սիրիայի տարածքում, Թուրքիայի հետ սահմանից 4 կմ հեռավորությամբ: Նա նաեւ միջադեպը «մեջքին հարված է» կոչել ահաբեկիչներին սատարողների կողմից: