Հայաստանում կիբերսպառնալիքի դեմ ապահովագրությամբ առայժմ միայն բանկերն են հետաքրքրվում: Այս մասին NEWS.am-ի թղթակցի հետ զրույցում հայտարարեց «ԻՆԳՈ Արմենիա» ապահովագրական ընկերության գործադիր տնօրեն Լեւոն Ալթունյանը:
Էլեկտրոնային հանցագործության դեմ «ԻՆԳՈ Արմենիա»-ն ապահովագրում է ավելի քան 3 տարի՝ որպես բանկերի ընդհանուր ապահովագրության մաս, եւ արդեն աշխատում է 4-5 բանկի հետ:
Վերջին շրջանում ընկերությունը ստիպված է եղել բարձրացնել ապահովագրավճարը՝ կիբերհանցագործությունների թվի աճի պատճառով: Դրա հետեւանքով տվյալների էլեկտրանային բազան արդյունավետ է ապահովագրել միայն սեփականության ընդհանուր ապահովագրության առկայության դեպքում: Հաճախորդի համար արդյունավետ չէ ապահովագրվել միայն կիբերհանցագործությունից: Ըստ Ալթունյանի, այդպիսի ապահովագրությունը շատ թանկ է:
«Իրական հատվածում առայժմ չեն հետաքրքրվում այդպիսի սպառնալիքներից ապահովագրմամբ: Պահանջարկն ավելի մեծ է բանկերի շրջանում, քանի որ նրանք պատասխանատվություն են կրում ավանդատուի առջեւ»,- նշեց Լեւոն Ալթունյանը: