Սու-24-ը խոցելուց առաջ թուրքական կողմը չի փորձել կապ հաստատել ռուսական ինքնաթիռի անձնակազմի հետ, իսկ Թուրքիայի ՌՕՈՒ-ի գրոհային կործանիչը խախտել է Սիրիայի օդային տարածքը: Այս մասին հայտարարել է Ռուսաստանի պաշտպանության նախարարությունը:
ՌԴ Զինված ուժերի Գլխավոր շտաբի գլխավոր օպերատիվ վարչության ղեկավար Սերգեյ Ռուդսկիի խոսքով, «օբյեկտիվ վերահսկողության հստակ տվյալների համաձայն, մեր ինքնաթիռը չի հատել Թուրքիայի հետ սահմանը»: «Նույնն են հաստատում նաեւ սիրիական ՀՕՊ տվյալները»,- ասել է գեներալ-լեյտենանտը:
Նոյեմբերի 24-ին Սիրիայում կործանվել է ռուսական Սու-24 ինքնաթիռը: ՌԴ նախագահ Վլադիմիր Պուտինը հայտարարել է, որ այն խոցվել է թուրքական F-16 կործանիչի կողմից եւ ընկել Սիրիայի տարածքում, Թուրքիայի հետ սահմանից 4 կմ հեռավորությամբ:
Թուրքական կողմը պնդում է, որ Թուրքիայի ՌՕՈՒ-ն ռուսական օդաչուներին բազմիցս նախազգուշացրել են երկրի օդային սահմանները խախտելու մասին: Պենտագոնը նույնպես հաստատել է այս տեղեկությունը:
