Ռուսաստանի հետ անցյալի վրա հիմնված հարաբերություններ ունենք, եւ տեղի ունեցածի պատճառով էներգետիկ ոլորտում բացասական զարգացումներ չեմ տեսնում։ Նման հայտարարություն է արել Թուրքիայի Էներգետիկայի եւ բնական պաշարների նորանշանակ նախարար Բերաթ Ալբայրաքը։
Թուրքական Internethaber կայքի փոխանցմամբ՝ Թուրքիայի նախագահի փեսա Բերաթ Ալբայրաքը, անդրադառնալով թուրքական ուժերի կողմից ահաբեկիչներին հարվածող ռուսական ռմբակոծիչը խոցելուց հետո ռուս-թուրքական էներգետիկ նախագծերից, ասել է, թե տեղի ունեցածը նոր է եւ ամեն ինչ պետք է մանրամասն ճշտել, նոր խոսել։ «Ռուսաստանի հետ երկար տարիների վրա հիմնված բարեկամություն, առեւտուր ու մշակույթային կապեր ունեցող երկիր ենք։ Ոչ միայն էներգետիկայի, այլ բազմաթիվ ոլորտներում կարեւոր հարաբերություններ ունեցող երկիր ենք։ Տեղի ունեցածի համատեքստում ես էներգետիկ ոլորտում բացասական զարգացումներ չեմ տեսնում»,-ասել է Բերաթ Ալբայրաքը։
Նշենք, որ նոյեմբերի 24-ին թուրքական ուժերը խոցել են Սիրիայում թուրքական կողմի աջակցությունը վայելող ահաբեկիչներին հարվածող ռուսական «Սու-24» ռմբակոծիչը։