Սերբիան որպես ԵԱՀԿ գործող նախագահող երկիր, աջակցում է ԵԱՀԿ Մինսկի խմբի համանախագահների գործունեությանը: Այս մասին, այսօր՝ նոյեմբերի 25-ին, Երեւանում ՀՀ պաշտպանության նախարար Սեյրան Օհանյանի հետ համատեղ ասուլիսի ժամանակ նշել է Սերբիայի պաշտպանության նախարար Բրատիսլավ Գաշիչը:

Նա ընդգծեց, որ Սերբիան կողմ է ԵԱՀԿ Մինսկի խմբի համանախագահների կողմից ներկայացված Մադրիդյան սկզբունքներին:

ՀՀ պաշտպանության նախարար Սեյրան Օհանյանն անդրադառնալով Թուրքիայի օդուժի կողմից թուրք-սիրիական սահմանին ռուսական «Սու-24» օդանավը խոցելուն, նշեց. «Այն պահին, երբ միջազգային հանրության ուշադրությունը սեւեռված է միջազգային ահաբեկչության հետ պայքարի վրա, նման գործողությունները հարված են այդ ջանքերին»:

Հարցին, թե ինչ պետք է անի Հայաստանը, եթե այս միջադեպի հետեւանքով լարվի իրադրությունը տարածաշրջանում, պնախարարը հիշեցրեց, որ Հայաստանն ու Ռուսաստանը ռազմավարական գործընկերներ են, եւ դա պայմանավորում է մեր հարաբերությունները: Միաժամանակ նա կոչ արեց սպասել իրադարձությունների հետագա զարգացմանը, հավելելով, որ համապատասխան իրադրությանը համապատասխան գործողություններ կլինեն:

Սեյրան Օհանյանն ընդգծեց, որ միջազգային հանրությունը պետք է ջանքեր գործադրի, որպեսզի թույլ չտա իրադրության սրում:

Հարցին, թե հնարավո՞ր է արդյոք, որ Հայաստանի հակաօդային պաշտպանության համակարգի եւ ՀՀ տարածքում ռուսական ՀՕՊ ստորաբաժանումները բարձր պատրաստվածության բերվեն, նա նշել է, որ համապատասխան ստորաբաժանումները գործում են ըստ պլանի:

Հիշեցնենք, որ նոյեմբերի 24-ին թուրք-սիրիական սահմանին Թուրքիայի ՌՕՈւ կողմից խոցվել էր ռուսական Սու-24 ռմբակոծիչը։ Ռուսական կողմը պնդում է, որ կործանիչը թռիչք է իրականացրել բացառապես Սիրիայի տարածքում։ Թուրքիան իր հերթին հայտարարում է, որ կործանիչը խոցվել է թուրք-սիրական սահմանը հատելուց հետո։