Թուրքիայի ՌՕՈւ խոցած Սու-24 ռուսական ռմբակոծիչի կործանումը կարող է հանգեցնել Սիրիայի հակամարտության վտանգավոր էսկալացիային։ Այս մասին հայտնում է Gazeta-ն՝ վկայակոչելով CNN-ը։
Նշվում է, որ Սիրիայի պատերազմն արդեն մի շարք ահաբեկչություններ է սադրել Փարիզում, որը հոդվածագիրն անվանում է Երկրորդ համաշխարհային պատերազմից ի վեր Եվրոպայի դեմ գործած ամենասարսափելի ահաբեկչական ակտը։ Հռոմի Պապ Ֆրանցիսկոս առաջինը Փարիզի ահաբեկչությունները որակեց որպես Երրորդ համաշխարհային պատերազմի սկիզբ, սակայն Սիրիայի հակամարտությունն ինքն իրենով վերածվում է հարյուրամյակի գլխավոր պատերազմի։
Հոդվածագիրն ընդգծում է, որ Սիրիայի հակամարտությունը բռնության շրջապտույտ է առաջ բերել։ Պատերազմը դուրս է եկել մի երկրի սահմաններից. շիաները սկսել են պատերազմել սուննիների դեմ, արաբները՝ իրանցիների, «Ալ Կաիդա» եւ «Իսլամական պետություն» ահաբեկչական կազմակերպությունները սկսել են մրցակցել իրար հետ, իսկ քրդերը որոշել են պատերազմ մղել Սիրիայի բանակի եւ ԻՊ-ի դեմ, իսկ Թուրքիան էլ որոշել է ոչնչացնել հենց քրդերին։
Կատարվածի ֆոնին սիրիացի փախստականները հաստատվել են ողջ աշխարհում, իսկ ահաբեկչություններից մարդիկ են զոհվում ոչ միայն հենց Սիրիայում, Իրաքում Լիբանանում եւ Թուրքիայում, այլ նաեւ Կանադայում, Ֆրանսիայում, Նիգերիայում, Դանիայում, Ավստրալիայում եւ այլ երկրներում։
«Հարմարավետ» միություններ, հակասական գործողություններ, տարօրինակ գործընկերություն, ահա այսպիսի տեսք ունի համաշխարհային պատերազմը, կարծում է հեղինակը։ Եվ այն փաստը, որ խճճված սիրիական հակամարտությունում արդեն այս կամ այն չափով ներգրավված է ավելի քան 60 երկիր, թույլ է տալիս եզրակացություն անել, որ Մերձավոր Արեւելքում իրավիճակը կարող է վերածվել Երրորդ համաշխարհային պատերազմի։
