Վրաստանը առաջընթաց է գրանցել կոռուպցիայի դեմ պայքարում: Հետեւությունը շատ պարզ է՝ Հայաստանը կարող է նույնը անել: Այս մասին կոռուպցիայի դեմ պայքարի շրջանակում նոյեմբերի 25-ին դոնորական կազմակերպությունների հետ քննարկման ժամանակ հայտնել է Հայաստանում Եվրոպական միության պատվիրակության ղեկավար դեսպան Պյոտր Սվիտալսկին:
Վկայակոչելով Transparency International կազմակերպության վարկանիշային սանդղակը, որտեղ 176 երկրների շարքում Հայաստանը 96 –րդ տեղն է զբաղեցնում, Ռուսաստանը՝ 161-րդ, իսկ Վրաստանը՝ 56-րդ՝ Սվիտելսկին շեշտել է. «Ես չգիտեմ, թե ինչով է Հայաստանը տարբերվում Վրաստանից »: Կոռուպցիայի դեմ պայքարում, ըստ դիվանագետի, վճռորոշը քաղաքական կամքն է:
«Հայաստանը հրաշալի փաստաթղթեր ունի: Ես կարող եմ ասել, որ կոռուպցիայի դեմ պայքարի ձեր ռազմավարությունը իմ տեսած լավագույն փաստաթղթերից մեկն է: Ձեր գործողությունների ծրագիրը հոյակապ փաստաթուղթ է: Խնդիրն այն է, որ անցած շաբաթ, երբ ես զրուցում էի երիտասարդների հետ ու հիշատակում այդ փաստաթղթերի մասին, նրանք ոչ թե քմծիծաղ էին տալիս, այլ ծիծաղում»,-նշել է Պյոտր Սվիտալսկին: Հետեւաբար, անհրաժեշտ է այդ փաստաթղթերը ամրապնդել գործողություններով, քաղաքական կամքով: «Երիտասարդ սերունդը պետք է պատասխանատու լինի, քանի որ դա ձեր ապագային է վերաբերում: Դուք կարող եք անել դա: Խնդրում եմ՝ արեք»,- ամփոփել է եվրոպացի դիվանագետը: