2015թ. սկզբից Հայաստանից միրգ-բանջարեղենի արտահանումն աճել է 68 տոկոսով եւ կազմել 70.2 հազար տոննա։ Այս մասին նոյեմբերի 25-ին լրագրողներին ասել է գյուղատնտեսության փոխնախարար Ռոբերտ Մակարյանը։
Հիմնական արտահանումը նախկինի պես բաժին է ընկնում Ռուսաստանին, ընդ որում ընդհանուր արտահանման մեջ նրա բաժինը կազմում է 84 տոկոս կամ 58900 տոննա։ 15 տոկոսը կամ 10.8 հազար տոննան արտահանվել է Վրաստան։ Ոչ մեծ քանակով միրգ-բանջարեղեն է արտահանվել Քուվեյթ, ԱՄԷ, Իրան, Ղազախստան, Չեխիա, Լեհաստան, Բելառուս։
Տարվա սկզբից Ռուսաստան է արտահանվել 11 հազար տոննա խաղող, անցյալ տարի նույն ժամանակահատվածում այդ ցուցանիշը կազմում էր 6.2 հազար։ Արտահանվել է 21.3 հազար տոննա ծիրան։ Սալորի արտահանումը կազմել է 3045 տոննա, կեռասինը՝ 2200 տոննա։
«Շատ էր խոսվում խնձորի վաճառքի դժվարությունների մասին։ Նշեմ, որ այս տարի արտահանվել է 1270 տոննա խնձոր, իսկ անցյալ տարի այդ ցուցանիշը 29 տոննա էր։ Նման խոսակցություններ կային նաեւ կաղամբի մասին։ Տարվա սկզբից արտահանվել է 120.2 հազար տոննա կաղամբ, իսկ 2014թ.՝ 2 հազար տոննա։ Արտահանվել է 3.7 հազար տոննա վարունգ (2014թ. 220 տոննա) եւ 1.3 հազար տոննա լոլիկ (2014թ. 6 անգամ պակաս )։ Ընդ որում թվերը վերջնական չեն, քանի որ արտահանումը շարունակվում է»,- ասել է փոխնախարարը։