Հայաստանի կառավարությունը, ԱՄՆ ու Մեծ Բրիտանիայի դեսպանատները, Եվրամիության պատվիրակությունը, ԵԱՀԿ երեւանյան գրասենյակը, Երեւանում Եվրախորհրդի գրասենյակը, Հայաստանում ՄԱԿ-ի գրասենյակը՝ քաղաքացիական հասարակության գործընկերների հետ համատեղ նոյեմբերի 25-ին ազդարարել են գենդերային բռնության դեմ 16-օրյա համաշխարհային քարոզարշավի մեկնարկը:
Բացելով միջոցառումը՝ Հայաստանում ՄԱԿ-ի մշտական համակարգողի ժամանակավոր պաշտոնակատար Գարիկ Հայրապետյանը նշել է, որ կանանց ու աղջիկների նկատմամբ բռնույթունը ոչ միայն քանդում է նրանց ընտանիքներն ու կյանքերը, այլեւ սպառնալիքի տակ դնում ամբողջ հասարակության տնտեսական ու սոցիալական առաջընթացը: «ՄԱԿ-ի ազգաբնակչության հիմնադրամի վերջին հետազոտությունը հաստատում է ասվածը»,- շեշտել է նա:
Ըստ ՀՀ Աշխատանքի ու սոցիալական հարցերով փոխնախարար Ֆիլարետ Բերիքյանի՝ գենդերային հավասարությունն առաջին հերթին մարդու իրավունքն է: «Կանայք արժանավայել ու առանց կարիքի ու վախի ապրելու իրավունք ունեն: Իսկ նրանց ներուժի լիարժեք գործածումը անհրաժեշտ գործիք է մեր երկրի զարգացման ու աղքատության մակարդակի նվազեցման համար »,- հավելել է փոխնախարարը: