Beeline-ը Հայաստանում ֆիքսված հեռախոսակապի ոչ աշխարհագրական հեռախոսահամարների շուկա է դուրս եկել: Հայաստանի Հանրային ծառայությունների կարգավորման հանձնաժողովը (ՀԾԿՀ) նոյեմբերի 25-ին ընկերությանն է տրամադրել 60 կոդը 83, 84 եւ 85 սկզբնահամարներով:
Ինչպես նշել է ՀԾԿՀ-ի հեռահաղորդակցության բաժանմունքի պետ Գեւորգ Գեւորգյանը, Ucom-ն ու «Ռոստելեկոմը» արդեն առաջարկում են ոչ աշխարհագրական կոդերով համարներ: Մի քանի այլ ընկերություններ դրանք ավելի փոքր ծավալով են օգտագործում, հիմնականում ներկորպորատիվ հեռախոսացանցերի համար:
Նոր ցանցում տվյալները փոխանցվում են CIP համակարգով, ինչը կորպորատիվ հաճախորդներին հնարավորություն կտա սեփական հեռախոսացանցեր (այսպես կոչված վիրտուալ ավտոմատ հեռախոսակայաններ) ստեղծել ներքին պահանջների կամ հաճախորդներին մատուցվող ծառայությունների (օրինակ` հեռազանգային կենտրոններում) համար:
Ինչպես NEWS.am-ի թղթակցին հայտնել է «ԱրմենՏել» ՓԲԸ-ի (Beeline-ի ապրանքանիշը) Մերուժան Միքայելյանը, նոր համարային տարողությունների համար ամբողջ անհրաժեշտ ցանցը պատրաստ է եւ դրանք կգործարկվեն մոտ ապագայում: