Հայաստան-Ալբանիա աղմկահարույց ֆուտբոլային խաղի կապակցությամբ օտարերկրյա լրատվամիջոցների տարածած հրապարակումները, որի համաձայն Հայաստանի հավաքականի 4 ֆուտբոլիստներ կաշառք են ստացել ալբանացիների հաղթանակը ապահովելու համար, ոստիկանության 6-րդ վարչությունը դեռ ուսումնասիրում է։ Այս մասին NEWS.am-ի հետ զրույցում հայտնել են ոստիկանության լրատվական ծառայությունից։
Նշենք, որ մոտ մեկ ամիս առաջ NEWS.am-ը գրել էր, որ նյութերը ՀՀ գլխավոր դատախազությունը ուղարկել է ոստիկանության ԿՀԴՊ գլխավոր (6-րդ) վարչություն, այսպես ասած ստուգողական աշխատանքներ կատարելու։
Մինչ ոստիկանությունը էական բացահայտումների մասին կհայտարարի, այսօր՝ նոյեմբերի 25-ին «Ազատություն» ռադիոկայանի հետ զրույցում ֆուտբոլի ֆեդերացիայի նախագահ Ռուբեն Հայրապետյանը հայտարարել է, որ Հայաստան - Ալբանիա խաղի ժամանակ տեղի է ունեցել դավաճանություն։ «Ցավոք սրտի, դա իմ համոզմունքն է։ Կարծում եմ, որ իրականում եղել է դա, և մեր գործն է, որ դա բացահայտենք, և այդ մարդկանց անունները հրապարակենք։ Դա իմ անձնական գործն է։ Ուղղակի մենք հիմա փաստեր չունենք, բայց կարծում եմ կլինեն։ Խաղը սկսվելուց կես ժա անց ես դա արդեն հասկացել էի»,-ասել է Հայրապետյանը՝ կարծիք հայտնելով, որ կբացահայտվի խաղի վաճառքը։
Հիշեցնենք, որ Հոկտեմբերի 11-ին ֆուտբոլի Հայաստանի հավաքականը, հյուրընկալելով Ալբանիայի հավաքականին, խոշոր՝ 0-3 հաշվով պարտություն կրեց: Հաղթանակը հնարավորություն տվեց ալբանացիներին անցնել «Եվրո-2016-ի» եզրափակիչ փուլ։ Խաղից հետո սերբական լրատվամիջոցները տեղեկություններ էին տարածել, թե Հայաստանի ընտրանու 4 ֆուտբոլիստներ կաշառվել են՝ ստանալով 500 հազարական եվրո:
