Եվրասիական միության ռեժիմը դանդաղեցնում է համակարգչային անվտանգության տեխնիկայի ներմուծումը Հայաստան: Այդ մասին NEWS.am-ի թղթակցին հայտնել է համակարգչային տեխնիկայի մանրածախ վաճառքով զբաղվող «Յունիկոմպ» ՓԲԸ-ի գլխավոր տնօրեն Արմեն Բալդրյանը:
ԵԱՏՄ-ի ռեժիմում դա ոլորտի մի քանի դժվարություններից մեկն է, հավելել է նա: Այլ տեխնիկայի հետ կապված ընթացակարգային մեծ բարդություններ չկան: Համակարգչային տեխնիկայի վրա դրված մաքսատուրքերը եւս չեն ավելացել:
«Հարցեր են առաջանում միայն ծածկագրման-վերծանման սարքերի հետ կապված: Դրանց համար հատուկ թույլտվություն է պահանջվում, որը նախկինում չկար: Իհարկե, դա արդարացված է, եթե խոսքը գաղտնի սարքերի մասին է, բայց կան նաեւ քաղաքացիական նշանակության սովորական սարքեր, որոնց պարագայում նման խստությունն անիմաստ է », - ասել է Բալդրյանը:
Այդ սարքերի թվին են պատկանում ֆաերվոլները, ռաուտերները, անհատական նույնականացման սարքերը (թոքենները): Դրանց համար թույլտվություն ստանալը 15-20 օր է տեւում:
