Թուրքիան օդանավի խոցմամբ գնաց չափազանց վտանգավոր ու ռիսկային քայլի, ինչն աննախադեպ էր եւ չեմ կարծում, որ նման քայլը նախապես հաշվարկված չէր։ Այսօր՝ նոյեմբերի 25-ին, լրագրողների հետ հանդիպմանը նման տեսակետ հայտնեց թուրքագետ Լևոն Հովսեփյանը։
Թուրքագետը նշեց, որ Թուրքիան դրանով փորձում է իրավիճակ փոխել եւ ինչ-ինչ իր համար շահեկան դիվիդենտներ ապահովել: «Խոսքը վերաբերում է ԱՄՆ-ի հետ հնարավոր համաձայնությանն ու իր դերակատարության մեծացմանը: Սա Թուրքիայի համար լավ հնարավորություն է. առճակատման գնալով Ռուսաստանի հետ փորձել ԱՄՆ-ին ներքաշել և որոշակիորեն փաստի առաջ կանգնեցնել անվտանգության գոտու ստեղծման հարցում: Անկարան արդեն երկար ժամանակ պատրաստում էր Սիրիայում թյուրքմենական գործոնը միջազգային քաղաքականության դաշտ տեղափոխելուն և այդ հարվածը հենց նաև այդ տրամաբանության մեջ է տեղավորվում: Սրանով փորձում են վճառական ու համարձակ երեւալ»,-նշեց բանախոսը:
Հովսեփյանի խոսքով` ռուս-թուրքական հարաբերությունները լարվածության աննախադեպ մակարդակի են հասել եւ Ռուսաստանն ուղղակի արդեն ստիպված է լինելու ինչ-որ կերպ պատասխանել թուրքական այդ քայլին: «Պատասխանը, կարծում եմ, կլինի առավելապես Սիրիայի տարածքում Անկարայի համար ցավագին հարվածներով ու գործողություններով, ինչպես նաեւ ռազմական ներկայության լուրջ մեծացմամբ: Մոսկվայի քայլերը այս կամ այն կերպ կտեղափոխվեն նաև տնտեսական ոլորտ: Ես բացառում եմ ռուս-թուրքական ռազմական բախումը, իսկ լարվածությունը երկար կպահպանվի»,-ասաց նա:
Հովսեփյանի համոզմամբ` այն ինչ եղավ ռուսական օդանավի հետ, նաեւ մեծ հաշվով, Ռուսաստանի անզգույշ քաղաքականության հետեւանք է, քանի որ Մոսկվան ավանդաբար փորձում էր աչք փակել լրջագույն խնդիրների վրա: «Այնպիսի խնդիրների, որոնք առաջանում էին Թուրքիայի քաղաքականության ու հավակնությունների առումով: Վերջին տարիներին ականատես էինք լինում ռուս-թուրքական հարաբերությունների աննախադեպ զարգացմանը, ինչը հիմնականում էներգետիկ-տնտեսական ոլորտով էր պայմանավորված, այդ ոլորտն էլ իր դերն էր ունենում քաղաքական հարաբերությունների վրա: Կողմերը փորձում էին ամեն կերպ խուսափել ռազմաքաղաքական, աշխարհաքաղաքական շահերի բախումից, բայց փաստորեն չհաջողվեց դա Սիրիայի պարագայում: Այս ինքնաթիռի խոցմամբ լրջորեն շահերի բախում գրանցվեց: Բայց ժամանակի հետ կողմերը չեն ցանկանա զոհել տարիների ընթացքում տնտեսական ոլորտում կուտակվածը և ունեցած բազան»,-ամփոփեց թուրքագետը: